ބޭންކް އޮފް މޯލްޑިވްސް (ބީއެމްއެލް) ގެ ސްކޮލަރޝިޕް ފަންޑުގެ ދެވަނަ ބެޗުގެ ތިން ދަރިވަރުން، އަލްޔާ، ސާޖިއު އަދި އައިކު، ޔުނައިޓެޑް ކިންގްޑަމް (ޔޫކޭ) ގައި މަތީ ތަޢުލީމު ހާސިލުކުރުމަށް ފުރުމަށް ތައްޔާރުވެއްޖެއެވެ.
މި ތިން ދަރިވަރުންނަކީ އަލްޔާ، ސާޖިއު އަދި އައިކުއެވެ. މިއަދު ބީއެމްއެލްގެ ޕީޕަލް އެންޑް ޗޭންޖް ޑިރެކްޓަރ، ސަހަރު ވަހީދު، މި ދަރިވަރުންނާ ބައްދަލުކޮށް އެމީހުންގެ ކިޔެވުމަށް ހެޔޮ އެދުންތައް ފާޅުކުރެއްވިއެވެ.
ބީއެމްއެލްއިން މި ދަރިވަރުންނަށް އެދިފައިވަނީ މި ތަޖުރިބާގެ ކޮންމެ ވަގުތަކުން އަގުހުރި މަންފާއެއް ލިބިގަތުމަށެވެ. މި ސްކޮލަރޝިޕް ޕްރޮގްރާމަކީ ބީއެމްއެލްއިން ދިވެހި ދަރިވަރުންނަށް ބޭރުގެ މަތީ ތަޢުލީމުގެ ފުރުސަތު ހޯދައިދިނުމަށް ކުރަމުންދާ މަސައްކަތުގެ ބައެކެވެ.
މި ސްކޮލަރޝިޕް ފަންޑަކީ ބޭންކިންގ އާއި މާލީ ދާއިރާއިން ހުނަރުވެރި ދިވެހި ޒުވާނުން ބިނާކުރުމުގެ މަޤްޞަދުގައި ރާއްޖޭން ބޭރުން މަތީ ތަޢުލީމު ހާސިލް ކުރުމުގެ ފުރުސަތު ހޯދައިދޭ ފަންޑެކެވެ. މި ފަންޑުގެ ދަށުން ހޮވާލެވޭ ދަރިވަރުންނަށް ބޭންކިންގ އެންޑް ފައިނޭންސްގެ ރޮނގުން އެކައުންޓިންގ، ފައިނޭންޝަލް ޓެކްނޮލޮޖީ، ފައިނޭންޝަލް އިންޖިނިއަރިންގ، ރިސްކް މެނޭޖްމަންޓް ނުވަތަ ފައިނޭންޝަލް ރިޕޯޓިންގ އެންޑް އެނަލެޓިކްސް ފަދަ ދާއިރާއަކުން އަންޑަގްރެޖުއޭޓް ޕްރޮގްރާމެއް ފުރިހަމަ ކުރުމުގެ ފުރުސަތު ލިބެއެވެ.
މި ސްކޮލަރޝިޕްގެ ދަށުން ޓިއުޝަން ފީ، މަހުން މަހަށް ހިނގާނެ ޚަރަދު، ވިސާ ފީ، ފޮތް ގަތުމުގެ ޚަރަދާއި އެސްޓަބްލިޝްމަންޓް އެލަވަންސްގެ އިތުރުން ޓިކެޓް ޚަރަދު ހިމެނޭ ހުރިހާ ޚަރަދެއް ބީއެމްއެލްއިން ދޭގޮތަށް ވަނީ ހަމަޖެހިފައެވެ.
