އޭދަފުށީ ކައުންސިލުން އިންތިޒާމުކޮށްގެން ބާއްވާ އޭދަފުށި ކަޕް 2024 މި މަހުގެ 25 ވަނަ ދުވަހު ފަށަން ތައްޔާރުވެއްޖެ އެވެ.
މުބާރާތް 25 ވާ ބުދަ ދުވަހު ފަށާއިރު، ގުރު ނެގުމުގެ ރަސްމިއްޔާތު މިރޭ ބޭއްވުމަށް ވަނީ ހަމަޖެހިފަ އެވެ. ގުރު ނެގުމުގެ ރަސްމިއްޔާތު މިރޭ 8:45 ގައި އޮންނާނީ އޭދަފުށީ މަލްޓީ ޕާޕަސް ހޯލުގަ އެވެ. މިއަހަރުގެ މުބާރާތުގައި ފަސް ޓީމަކުން ވާދަކުރެ އެވެ. އެއީ ހުސް ސޮންގުން ފުޓްބޯޅަ ޓީމާއި، ވެލާ ސްޕޯޓްސް ކްލަބް، އިރުމަތި އެފްސީ، ކައްކަނީ ސްޕޯޓްސް ކްލަބް އަދި ވީ ވެލާ އެވެ.
މުބާރާތުގެ ފައިނަލް މެޗު ކުޅުމަށް ހަމަޖެހިފައިވަނީ އަންނަ މަހުގެ ހަތަރު ވަނަ ދުވަހު އެވެ. އޭދަފުށީގައި ތަރައްގީކޮށްފައިވާ ފެންވަރު ރަނގަޅު ސްޓޭޑިއަމްގައި ކައުންސިލުން އިސްނަގައިގެން އޭދަފުށި ކަޕް ބާއްވަން ފެށީ 2021 ވަނަ އަހަރު އެވެ. މިއީ ކައުންސިލުން އިންތިޒާމުކޮށްގެން އެ މުބާރާތް ބާއްވާ ހަތަރު ވަނަ އަހަރެވެ.
މުބާރާތުގެ މިދިޔަ އަހަރުގެ ޗެމްޕިއަންކަން ހޯދީ ހުސް ސޮންގުންނެވެ. އޭގެކުރީ ދެ އަހަރު ޗެމްޕިއަންކަން ހޯދީ އެމްވީ ޔުނައިޓެޑެވެ. މިއަހަރުގެ މުބާރާތުގައި އެމްވީ ޔުނައިޓެޑް ވާދައެއް ނުކުރެ އެވެ.
އޭދަފުށި ކަޕްގެ މިއަހަރުގެ އޮންލައިން މީޑިއާ ޕާޓްނަރަކީ އޭދަފުށި ޓައިމްސް އެވެ. މި ނޫސް މެދުވެރިކޮށް މުބާރާތުގެ އެންމެ ފަހުގެ މައުލޫމާތު ގެނެސްދިނުމަށް ވަނީ ހަމަޖެހިފަ އެވެ.
