ފެނަކަ ކޯޕަރޭޝަނަށް ބޮޑެތި ގެއްލުންތަކެއް ވަމުންދާތީ، ކުރީގެ ސަރުކާރުން އެ ކުންފުންޏާ ހަވާލުކުރި ބ. އަތޮޅުގެ ފަސް ރަށް ހިމެނޭ ގޮތަށް ޖުމްލަ 16 ރަށެއްގެ ނަރުދަމާ ޕްރޮޖެކްޓް ބާތިލްކޮށްފިއެވެ.
މި ޕްރޮޖެކްޓްތައް ބާތިލްކުރީ ކޮންސްޓްރަކްޝަން މިނިސްޓްރީއާއެކު ވެފައިވާ އެއްބަސްވުން އުވާލުމަށްފަހުއެވެ.
ބާތިލްކުރެވުނު ޕްރޮޖެކްޓްތަކުގެ ތެރޭގައި ބ. އަތޮޅުގެ ދޮންފަނު، ފެހެންދޫ، ފޮޅުދޫ، ކުޑަރިކިލު އަދި ކިހާދޫ ހިމެނެއެވެ. މީގެ އިތުރުން ށ. އަތޮޅުގެ ބިލެއްފަހި އަދި ނޫމަރާ، ނ. އަތޮޅުގެ ލަންދޫ، މިލަދޫ އަދި މަގޫދޫ، ތ. އަތޮޅުގެ މަޑިފުށި އަދި ދިޔަމިގިލި، މ. އަތޮޅުގެ ރަތްމަންދޫ އަދި ނާލާފުށި، ލ. އަތޮޅުގެ ކުނަހަންދޫ އަދި އދ. އަތޮޅުގެ ފެންފުށީގެ ނަރުދަމާ ޕްރޮޖެކްޓްތައް ވެސް ބާތިލްކުރެވިފައިވެއެވެ.
ފެނަކައިން މިއަދު ބޭއްވި ނޫސްވެރިންގެ ބައްދަލުވުމުގައި އެ ކުންފުނީގެ ޑިރެކްޓަރު އަބްދުލް ވާހިދު މުޙައްމަދު ވިދާޅުވީ، މި ޕްރޮޖެކްޓްތަކަށް މިހާތަނަށް އެޑްވާންސް ފައިސާގެ ގޮތުގައި 518 މިލިއަން ރުފިޔާ ދޫކޮށްފައިވާއިރު، މަސައްކަތަށް ހޭދަކޮށްފައިވަނީ އެންމެ 92 މިލިއަން ރުފިޔާ ކަމަށެވެ. އަދި މި ޕްރޮޖެކްޓްތަކުން ޖުމްލަ 170 މިލިއަން ރުފިޔާގެ ގެއްލުން ވާނެކަމަށް އަންދާޒާކުރެވޭ ކަމަށް ވެސް އޭނާ ވިދާޅުވިއެވެ.
ވާހިދު ފާހަގަކުރެއްވި ގޮތުގައި، ޕްރޮޖެކްޓްތައް ފެށިއިރު ފެނަކައިގައި އެކަށީގެންވާ މެޝިނަރީތައް ނެތުމުން، ގިނަ އިކުއިޕްމަންޓްތައް ހޯދަން ޖެހުނީ ކުއްޔަށް ނަގައިގެންނެވެ. މީގެ ސަބަބުން ޕްރޮޖެކްޓްގެ ޚަރަދުތައް އިތުރަށް ބޮޑުވެގެން ދިޔައެވެ.
އިތުރު ކަންބޮޑުވުމެއްގެ ގޮތުގައި ވާހިދު ފާހަގަކުރެއްވީ، ޕްރޮޖެކްޓްތަކުގެ ސައިޓުތަކަށް ފޮނުވުނު އާދައިގެ މަސައްކަތު މީހުންގެ މުސާރަ 45,000 ރުފިޔާއަށް އަރާ ކަމެވެ. މިއީ މި ދާއިރާގެ ކޮންސަލްޓަންޓުންނަށް ވެސް ނުލިބޭވަރުގެ މުސާރައެއް ކަމަށް އޭނާ ވިދާޅުވިއެވެ.
ޕްރޮޖެކްޓްތައް ބާތިލްކުރިއިރު، އެންމެ ގިނައިން މަސައްކަތް ކުރިއަށްގެންދެވުނު ރަށްރަށުގައި ވެސް ނިމިފައިވަނީ އެންމެ 15 ޕަސެންޓްގެ މަސައްކަތް ކަމަށް ވާހިދު ވިދާޅުވިއެވެ. މިހާރު ފެނަކައިން ވަނީ މި ޕްރޮޖެކްޓްތަކަށް ގަނެފައިވާ 26 އާރްއޯ ޕްލާންޓާމެދު ޢަމަލުކުރާނެ ގޮތެއް ނިންމުމުގެ މަސައްކަތް ފަށާފައެވެ.
އަޅުގަނޑަށް ހެޔޮ ނަރުދަމާ ނެތަސް ވޯޓުލައިގެން ލާރިކޮޅެއްލިބުން. ވޯޓު ދުވަސްވަރު ހިލޭ ސައި ވެސް ލިބުން
މި ފެންނަނީ ސަރުކާރުން މިފަދަ ރަށްތަކުގެ ރައްޔިތުންނަށް ދޭ އަހައްމިއްޔަތު. ދެންވެސް ހޭއަރާކަށްނުވޭތަ. އަދިވެސް އަތްޖަހަން ތިބޭ. އަމިއްލަ އެދުން އިސްކުރުމުގެ ނަތީޖާ މިފެންނަނީ. އެކަމުގެ ހިތްދަތިކަން ތިމާމެންގެ ކަރުގައިވެސް ލާނެ.
މި ފެންނަނީ ސަރުކާރުން މިފަދަ ރަށްތަކުގެ ރައްޔިތުންނަށް ދޭ އަހައްމިއްޔަތު. ދެންވެސް ހޭއަރާކަށްނުވޭތަ. އަދިވެސް އަތްޖަހަން ތިބޭ. އަމިއްލަ އެދުން އިސްކުރުމުގެ ނަތީޖާ މިފެންނަނީ. އެކަމުގެ ހިތްދަތިކަން ތިމާމެންގެ ކަރުގައިވެސް ލާނެ.