ވަރުގަދަ ސްކޮޑަކާ އެކު އޭދަފުށި ކަޕް 2024 އަށް ތައްޔާރުވި ވެލާ ސްޕޯޓްސް ކްލަބުން ފުރަތަމަ މެޗުގައި ބޮޑު މޮޅެއް ހޯދައިފި އެވެ.
އޭދަފުށީ ފުޓްބޯޅަ ސްޓޭޑިއަމްގައި މިރޭ ކުޅުނު މެޗުގައި ވީ ވެލާއާ ވާދަކޮށް ވެލާ ސްޕޯޓްސް މޮޅުވީ 0-11 ގެ ބޮޑު ތަފާތަކުންނެވެ.
ވީ ވެލާ އަކީ ވެލާ ސްޕޯޓްސްގެ ދަށުން އުފައްދާފައިވާ ޓީމެކެވެ. އެޓީމުގައި ގިނައިން ހިމެނެނީ ޒުވާން ކުޅުންތެރިންނެވެ. މިއީ ވީ ވެލާ މުބާރާތުގައި ވާދަކުރާ ދެވަނަ ފަހަރެވެ.
މިރޭގެ މެޗު އެއްކޮށް ކޮންޓްރޯލް ކޮށްގެން ކުޅުނީ ވެލާ ސްޕޯޓްސް އިންނެވެ. މެޗުގައި ވެލާ ސްޕޯޓްސްގެ 11 ގޯލުގެ ތެރެއިން ތިން ގޯލު ޖަހައި ހުސައިން ޝަރީފް (މުޑާ) ހެޓްރިކް ހެދި އެވެ. ބާކީ ގޯލުތަކުގެ ތެރެއިން މުހައްމަދު ފާސިރު (ފާއްޓެ)، މުހައްމަދު ރަފްހާން، ކޮންމެ ކުޅުންތެރިއަކު ދެ ގޯލު ޖެހި އެވެ.
ވެލާ ސްޕޯޓްސް އަށް ދެން ގޯލުތައް ކާމިޔާބުކޮށްދިނީ އިބްރާހީމް ޝަރީފް އާއި މުހައްމަދު ޝާން، އަހުމަދު ސުހައިލް އަދި އަހުމަދު ޖައުޝަން އަބްދުﷲ (ޖައު) އެވެ. މެޗުގެ މޮޅު ކުޅުންތެރިޔާގެ މަގާމް ހޯދީ ފާއްޓެ އެވެ.
މުބާރާތުގައި މާދަމާ ހަވީރު ކުޅޭ މެޗުގައި ބައްދަލުކުރާނީ އިރުމަތި އެފްސީ އަދި ހުސް ސޮންގުންނެވެ. އެ މެޗު ފަށާނީ ހަވީރު 3:50 ގަ އެވެ.
މާދަމާ ރޭ ކުޅޭ މެޗުގައި ބައްދަލުކުރާނީ ކައްކަނީ އެފްސީ އާއި ވީ ވެލާ އެވެ. މުބާރާތުގެ ފުރަތަމަ މެޗުގައި ހުސް ސޮންގުންނާއި ކައްކަނީ އެފްސީ ވާދަކޮށް ވަނީ 1-1 އިން އެއްވަރުވެފަ އެވެ.
އޭދަފުށި ކަޕްގެ ޑިޖިޓަލް ޕާޓްނަރަކީ އުރީދޫ އެވެ. ކިޓް ޕާޓްނަރަކަށް ކެޕްޓަން މޯލްޑިވްސް ހަމަޖައްސާފައިވާއިރު ޓްރާންސްޕޯޓް ޕާޓްނަރަކީ ފެހި ސްޕީޑް އެވެ.
ޕްރިންޓިން ޕާޓްނަރަކީ އިންކެޑް މޯލްޑިވްސް އެވެ. ބެވަރޭޖް ޕާޓްނަރަކީ ލައިފް ވޯޓާ އެވެ. އިތުރު ސްޕޮންސަރުންގެ ތެރޭގައި މައިލޯ މޯލްޑިވްސް އާއި އަޒްޑިއޮން، އެލް މޯބައިލް އަދި އެމް 7 ހިމެނެ އެވެ.
މުބާރާތުގެ އޮންލައިން މީޑިއާ ޕާޓްނަރަކީ އޭދަފުށި ޓައިމްސް އެވެ.
