އޭދަފުށި ކަޕް 2024 ގައި މިއަދު ހަވީރު އިރުމަތި އެފްސީ އިން ހުސް ސޮންގުންނާ ދެކޮޅަށް ކުޅުނު މެޗު 0-0 އިން އެއްވަރުކޮށްފި އެވެ.
ހުސް ސޮންގުންނަކީ މިދިޔަ އަހަރު މުބާރާތުގެ ޗެމްޕިއަނުންނެވެ. މިއަހަރުގެ މުބާރާތުގައި އެޓީމު ކުޅުނު ދެ މެޗު ވެސް ވަނީ އެއްވަރުވެފަ އެވެ. ފުރަތަމަ މެޗުގައި ކައްކަނީ އެފްސީއާ ވާދަކޮށް އެއްވަރުވީ 1-1 އިންނެވެ.
މިއަދުގެ މެޗަކީ އިރުމަތި އެފްސީ އިން މުބާރާތުގައި ކުޅުނު ފުރަތަމަ މެޗެވެ.
މެޗުގައި ދެޓީމަށް ވެސް ގޯލު ޖަހާނެ ފުރުސަތުތައް ލިބި ބޭކާރުވި އެވެ. މެޗުގެ މޮޅު ކުޅުންތެރިޔާގެ މަގާމް ހޯދީ ހުސް ސޮންގުން ޓީމުގެ ޑިފެންޑަރު އަހުމަދު ހަނީފް އެވެ.
މުބާރާތުގެ ފައިނަލުގެ ފުރަތަމަ ޖާގަ ލިބޭނީ ލީގު ބުރުން އެއްވަނަ ލިބޭ ޓީމަކަށެވެ. ފައިނަލުގެ ފަހު ޖާގަ ލިބޭނީ ލީގު ބުރުގެ ދެވަނަ ޓީމާއި ތިންވަނަ ޓީމު ކުޅެގެން މޮޅުވާ ޓީމަކަށެވެ. ފައިނަލް މެޗު ކުޅޭނީ އަންނަ މަހުގެ ހަތަރު ވަނަ ދުވަހު އެވެ.
އޭދަފުށި ކަޕްގެ ޑިޖިޓަލް ޕާޓްނަރަކީ އުރީދޫ އެވެ. ކިޓް ޕާޓްނަރަކަށް ކެޕްޓަން މޯލްޑިވްސް ހަމަޖައްސާފައިވާއިރު ޓްރާންސްޕޯޓް ޕާޓްނަރަކީ ފެހި ސްޕީޑް އެވެ.
ޕްރިންޓިން ޕާޓްނަރަކީ އިންކެޑް މޯލްޑިވްސް އެވެ. ބެވަރޭޖް ޕާޓްނަރަކީ ލައިފް ވޯޓާ އެވެ. އިތުރު ސްޕޮންސަރުންގެ ތެރޭގައި މައިލޯ މޯލްޑިވްސް އާއި އަޒްޑިއޮން، އެލް މޯބައިލް އަދި އެމް 7 ހިމެނެ އެވެ.
މުބާރާތުގެ އޮންލައިން މީޑިއާ ޕާޓްނަރަކީ އޭދަފުށި ޓައިމްސް އެވެ.
މުބާރާތުގައި މިރޭ ކުޅޭ މެޗުގައި ބައްދަލުކުރާނީ ކައްކަނީ އާއި ވީ ވެލާ އެވެ. މެޗު ފަށާނީ ރޭގަނޑު 9 ޖަހާއިރު އެވެ.
