އޭދަފުށި ކަޕް ފުޓްބޯޅަ މުބާރާތުގައި މިރޭ ކުޅުނު މެޗުގައި ވީ ވެލާ އަތުން ބޮޑު ތަފާތަކުން ކައްކަނީ އެފްސީ މޮޅުވެއްޖެ އެވެ.
ކައްކަނީ އިން ވީ ވެލާ ބަލިކުރީ 0-11 އިންނެވެ.
ޒުވާން ޓީމަކާ އެކު މުބާރާތުގައި ވާދަކުރާ ވީ ވެލާ އިން ކުޅުނު ފުރަތަމަ މެޗުގައި 11-0 އިން ވެލާ ސްޕޯޓްސް ކްލަބް އަތުން ވަނީ ބަލިވެފަ އެވެ. ދެ މެޗުން އެޓީމު ކޮޅަށް 22 ގޯލު ވަނީ ވަދެފަ އެވެ.
މުބާރާތުގެ ފުރަތަމަ މެޗުގައި ކައްކަނީ އިން ވަނީ ހުސް ސޮންގުންނާއި 1-1 އިން އެއްވަރުކޮށްފަ އެވެ.
ދެ މެޗަށް ފަހު ކައްކަނީ ވަނީ ހަތަރު ޕޮއިންޓް ހޯދައިފަ އެވެ.
ކައްކަނީ އިން މެޗުގައި ޖެހި 11 ގޯލުގެ ތެރެއިން ހަތަރު ގޯލު ޖެހީ އަލީ ނަސޫހު ރަޝީދު އެވެ. ހަތަރު ގޯލާ އެކު ނަސޫހު ވަނީ މެޗުގެ މޮޅު ކުޅުންތެރިޔާގެ މަގާމް ވެސް ހޯދާފަ އެވެ.
ނަސޫހުގެ އިތުރުން ގޯލުތައް ކާމިޔާބުކުރީ ޝާފިއު މުހައްމަދާއި، ރައްޒާން ރަޝީދު، ރަޝާދު އަބްދުއްލަތީފް، އިސްމާއީލް ފައުޒީ އަދި ހުސައިން ޝަމަން އެވެ. ޝާފިއު އާއި ރަޝާދު، ކޮންމެ ކުޅުންތެރިއަކު ވަނީ ދެ ގޯލު ޖަހައިފަ އެވެ.
މެޗުގައި ވީ ވެލާ އިން އުފެއްދި ހަމަލާއެއްގައި ގޯލެއް ވެސް ކާމިޔާބުކުރި އެވެ. އެކަމަކު އެވަގުތު ވީ ވެލާގެ ކުޅުންތެރިޔާ އޮފްސައިޑް މަގާމެއްގައި ހުރުމުން ގޯލު ގަބޫލެއްނުކުރެ އެވެ.
އޭދަފުށި ކަޕްގެ ޑިޖިޓަލް ޕާޓްނަރަކީ އުރީދޫ އެވެ. ކިޓް ޕާޓްނަރަކަށް ކެޕްޓަން މޯލްޑިވްސް ހަމަޖައްސާފައިވާއިރު ޓްރާންސްޕޯޓް ޕާޓްނަރަކީ ފެހި ސްޕީޑް އެވެ.
ޕްރިންޓިން ޕާޓްނަރަކީ އިންކެޑް މޯލްޑިވްސް އެވެ. ބެވަރޭޖް ޕާޓްނަރަކީ ލައިފް ވޯޓާ އެވެ. އިތުރު ސްޕޮންސަރުންގެ ތެރޭގައި މައިލޯ މޯލްޑިވްސް އާއި އަޒްޑިއޮން، އެލް މޯބައިލް އަދި އެމް 7 ހިމެނެ އެވެ.
މުބާރާތުގެ އޮންލައިން މީޑިއާ ޕާޓްނަރަކީ އޭދަފުށި ޓައިމްސް އެވެ.
މުބާރާތުގައި މާދަމާ ހަވީރު ކުޅޭ މެޗުގައި ބައްދަލުކުރާނީ ވެލާ ސްޕޯޓްސް ކްލަބާއި އިރުމަތި އެފްސީ އެވެ. ރޭގަނޑު ކުޅޭ މެޗުގައި ބައްދަލުކުރާނީ ހުސް ސޮންގުންނާއި ވީ ވެލާ އެވެ.
