މާދަމާ އައްޑޫގައި ފަށާ ޖޫނިއާ އޯޕަން ބެޑްމިންޓަން މުބާރާތުގައި ވާދަކުރުމަށް ރިވައިވަލް އޭދަފުށި ބެޑްމިންޓަން އެކަޑަމީގެ ކުޅުންތެރިން އައްޑުއަށް ފުރައިފި އެވެ.
މި މުބާރާތަކީ ޖޫނިއާ ކުޅުންތެރިންނަށް އަމާޒުކޮށްގެން އައްޑޫ ޓްރައިޑީ ސްޕޯޓްސް އެކަޑަމީން ބާއްވާ މުބާރާތެކެވެ.
މި މުބާރާތުގައި މާލެ އާއި އަތޮޅުތެރޭގެ އެކި ރަށްރަށުގެ ބެޑްމިންޓަން އެކަޑަމީތަކުގެ ކުޅުންތެރިން ވެސް ވާދަކުރެ އެވެ.
މާދަމާ އިން ފެށިގެން އޮކްޓޯބަރު 3 ގެ ނިޔަލަށް ކުރިއަށްދާ މި މުބާރާތުގައި ރިވައިވަލް ސްޕޯޓްސް އޭދަފުށި އެކެޑަމީގެ 28 ކުޅުންތެރިން ހަތަރު ކެޓަގަރީގައި ވާދަކުރާނެ އެވެ.
އޭދަފުށީ ބެޑްމިންޓަން އެކަޑަމީން ބުނީ މިއީ ޒުވާން ކުޅުންތެރިންނަށް ތަޖުރިބާ ކޮށްލަން ލިބޭނެ ރަނގަޅު މުބާރާތެއް ކަމަށާއި މީގެ ސަބަބުން ގިނަ ފައިދާތަކެއް ކުރާނެ ކަމަށެވެ.
ރިވައިވަލް ސްޕޯޓްސް އޭދަފުށި ގެ ނަމުގައި ރިވައިވަލްގެ ބެޑްމިންޓަން އެކަޑަމީއެއް ގާއިމުކުރީ މިއަހަރުގެ ޖެނުއަރީ 1 ގަ އެވެ.
ޒުވާން ހުނަރުވެރި އެތުލީޓުންނަށް އެމީހުންގެ އެންމެ ފުރިހަމަ ގާބިލްކަން ހޯދުމަށް އެހީތެރިވުމަށް ބޭނުންވާ ތަމްރީނާއި ތަރައްގީ އަދި މުބާރާތުގެ ފުރުސަތުތައް ހޯދައިދިނުމަށް އެ އެކަޑަމީން އަންނަނީ ގިނަ މަސައްކަތްތަކެއް ކުރަމުންނެވެ. އެގޮތުން ރިވައިވަލްގެ އެހީތެރިކަމާއެކު އޭދަފުށީގެ ކުޅުންތެރިން ވަނީ، މެލޭޝިއާގައި ޓްރެއިނިން ކޭމްޕްތަކެއް ވެސް ފުރިހަމަކޮށްފަ އެވެ.
މީގެ އިތުރުން، އެ އެކަޑަމީގެ އެތުލީޓް މުހައްމަދު ހައްޔާން ބިން އަބްދުލްހަންނާނު ވަނީ ސައުތު އޭޝިއަން ރީޖަނަލް ޖޫނިއާ ބެޑްމިންޓަން ޗެމްޕިއަންޝިޕްގައި ރާއްޖެ ތަމްސީލުކުރި އެތްލީޓުންގެ ތެރޭގައި ހިމެނި މި މުބާރާތުގެ 17 އަހަރުންދަށުގެ ޓީމު އިވެންޓް އަދި 17 އަހަރުން ދަށުގެ ފިރިހެން ޑަބަލްސް އިން ބްރޯޒް މެޑަލް ހޯދާފަ އެވެ.
