ބަލިވާން ދަނިކޮށް ފަހު ވަގުތު ޖެހި ގޯލުތަކުން މޮޅުވެ، ވެލާ ސްޕޯޓްސް ކްލަބް އޭދަފުށި ކަޕް ލީގު ބުރުގެ އެއް ވަނަ އަށް ކުރިއަށް ޖެހިލައިފި އެވެ.
އޭދަފުށީ ފުޓްބޯޅަ ސްޓޭޑިއަމްގައި މިއަދު ހަވީރު ކައްކަނީ އެފްސީއާ ދެކޮޅަށް ކުޅުނު މެޗުން ވެލާ ސްޕޯޓްސް މޮޅުވީ 2-4 އިންނެވެ. މެޗުން ވެލާ ސްޕޯޓްސް މޮޅުވީ ކައްކަނީ އިން ދެ ގޯލު ޖަހާފައި ވަނިކޮށް ފަހަތުން އަރަ އެވެ.
މެޗުގެ ފުރަތަމަ ހާފުގެ 27 ވަނަ މިނެޓުގައި ކައްކަނީގެ ފުރަތަމަ ގޯލު ކާމިޔާބުކޮށްދިނީ އަލީ ނަސޫހު ރަޝީދު އެވެ. ދެވަނަ ހާފުގެ 62 ވަނަ މިނެޓުގައި ކައްކަނީގެ ދެވަނަ ގޯލު ވެސް ކާމިޔާބުކޮށްދިނީ ނަސޫހު އެވެ.
ފުރަތަމަ ހާފުގައި ކައްކަނީގެ ގޯލްކީޕަރު އިބްރާހީމް ޔޫސުފް އަށް އަނިޔާވުމުން ބަދަލުކުރަން ޖެހުނެވެ.
ދެވަނަ ހާފު ވެލާ ސްޕޯޓްސް އިން ކުރިއަށް ޖެހި ހަމަލާތައް ވަރުގަދަކުރި އެވެ. އެޓީމުގެ ފުރަތަމަ ދެ ގޯލު ޖެހީ މުހައްމަދު ފާސިރު (ފާއްޓެ) އެވެ. ފާއްޓެ ފުރަތަމަ ގޯލު ޖެހީ 73 ވަނަ މިނެޓުގަ އެވެ. ވެލާ ސްޕޯޓްސް އަށް ނަތީޖާ ހަމަހަމަކޮށްދިން ގޯލު ފާއްޓެ ޖެހީ މެޗު ނިމެން މިނެޓަކަށް ވެފައިވަނިކޮށެވެ.
ނަތީޖާ ހަމަހަމަ ކުރުމަށް ފަހު އުފެއްދި ހަމަލާގައި ވެލާ ސްޕޯޓްސް އަށް ލީޑު ނަގައިދިނީ ނިޝާމް މުހައްމަދު ރަޝީދު (ޕޮގްބާ) އެވެ. އިތުރު ވަގުތުގެ ފަހު މިނެޓުގައި ވެލާ ސްޕޯޓްސްގެ ފަހު ގޯލު ކާމިޔާބުކޮށްދިނީ އަހުމަދު ޖައުޝަން އަބްދުﷲ (ޖައު) އެވެ.
މިއަދުގެ މެޗާ އެކު ލީގު ބުރުގެ އެއް ވަނަ އަށް ވެލާ ކުރިއަށް ޖެހިލީ ތިން މެޗުން 6 ޕޮއިންޓާ އެކު އެވެ. އެޓީމަށް ބާކީ އޮތީ މާދަމާ ހަވީރު ހުސް ސޮންގުންނާ ދެކޮޅަށް ކުޅޭ މެޗެވެ. ލީގު ބުރުގެ ދެ ވަނައިގައި އޮތީ 5 ޕޮއިންޓާ އެކު ހުސް ސޮންގުންނެވެ.
ތިން ވަނައިގައި އޮތް ކައްކަނީ އާއި ހަތަރު ވަނައިގައި އޮތް އިރުމަތި އެފްސީ އަށް ވަނީ ހަތަރު ޕޮއިންޓް ލިބިފަ އެވެ. އެކަމަކު ކައްކަނީ އަށް ބާކީ އޮތީ އިރުމަތި އެފްސީއާ ވާދަކުރާ މެޗު އެކަންޏެވެ. އިރުމަތި އެފްސީ އަށް ބާކީ ދެ މެޗު އެބައޮތެވެ.
ތިން މެޗުން ވެސް ބަލިވި ވީ ވެލާ މިހާރު ވަނީ މުބާރާތުން ކަޓައިފަ އެވެ.
މިއަހަރުގެ މުބާރާތުގެ ޑިޖިޓަލް ޕާޓްނަރަކީ އުރީދޫ އެވެ. ޓްރާންސްޕޯޓް ޕާޓްނަރަކަށް ފެހި ސްޕީޑް ހަމަޖައްސާފައި ވާއިރު ކިޓް ޕާޓްނަރަކީ ކެޕްޓަން މޯލްޑިވްސް އެވެ.
ޕްރިންޓިން ޕާޓްނަރަކީ އިންކެޑް މޯލްޑިވްސް އެވެ. ބެވަރޭޖް ޕާޓްނަރަކީ ލައިފް ވޯޓާ އެވެ. އިތުރު ސްޕޮންސަރުންގެ ތެރޭގައި މައިލޯ މޯލްޑިވްސް އާއި އަޒްޑިއޮން، އެލް މޯބައިލް އަދި އެމް 7 ހިމެނެ އެވެ.
މުބާރާތުގެ އޮންލައިން މީޑިއާ ޕާޓްނަރަކީ އޭދަފުށި ޓައިމްސް އެވެ.
މިރޭ ކުޅޭނީ އިރުމަތި އެފްސީ އާއި ވީ ވެލާ އެވެ. އެ މެޗު ފަށާނީ 9 ޖަހާއިރު އެވެ.
