އޭދަފުށި ކަޕް 2024 ގައި މިއަދު ހަވީރު ހުސް ސޮންގުންނާއި 3-3 އިން އެއްވަރުކޮށް ވެލާ ސްޕޯޓްސް ކްލަބުން މުބާރާތުގެ ސެމީ ފައިނަލުގެ ޖާގައެއް ކަށަވަރުކޮށްފި އެވެ.
މެޗު އެއްވަރުވުމާ އެކު މިދިޔަ އަހަރުގެ ޗެމްޕިއަން ހުސް ސޮންގުންނަށް މުބާރާތުގައި ކުރިއަށް ދެވޭނީ މާދަމާ ކުޅޭ ލީގު ބުރުގެ ފަހު މެޗުގެ ނަތީޖާ ނުކުންނަ ގޮތަކުންނެވެ.
ފަސް ޓީމު ވާދަކުރާ ލީގު ބުރުގެ ފަހު މެޗުގައި މާދަމާ ހަވީރު ކުޅޭނީ ކައްކަނީ އެފްސީ އާއި އިރުމަތި އެފްސީ އެވެ.
މިވަގުތު އެއް ވަނައިގައި އޮތް ވެލާ ސްޕޯޓްސް އާއި ދެ ވަނައިގައި އޮތް އިރުމަތި އެފްސީ އަށް ވަނީ 7 ޕޮއިންޓް ލިބިފަ އެވެ. ތިން ވަނައިގައި އޮތް ހުސް ސޮންގުންނަށް 6 ޕޮއިންޓް ލިބިފައިވާއިރު ހަތަރު ވަނައިގައި އޮތް ކައްކަނީ އެފްސީ އަށް ލިބިފައިވަނީ 4 ޕޮއިންޓެވެ. ކުޅުނު ހަތަރު މެޗުން ވެސް ބަލިވި ވީ ވެލާ މިހާރު ވަނީ ކަޓައިފަ އެވެ.
މިއަދުގެ މެޗުގެ ފުރަތަމަ ހާފު ނިމުނީ 2-3 އިން ހުސް ސޮންގުން ކުރީގައި އޮވެގެންނެވެ. މެޗުގައި ހުސް ސޮންގުންގެ ގޯލުތައް ކާމިޔާބުކޮށްދިނީ ބިދޭސީ ދެ ކުޅުންތެރިންނެވެ. އެޓީމުގެ ފޯވާޑް އިބްރާހީމް ދެ ގޯލު ޖެހިއިރު އަނެއް ގޯލު ކާމިޔާބުކޮށްދިނީ ޗުކްވުކާ މައިކަލް އެވެ.
ވެލާ ސްޕޯޓްސްގެ ދެ ގޯލު ފުރަތަމަ ހާފުގައި ކާމިޔާބުކޮށްދިނީ އިބްރާހީމް ޝަރީފް އާއި އަހުމަދު ޖައުޝަން އަބްދުﷲ (ޖައު) އެވެ.
ދެ ވަނަ ހާފު ފަށައިގެން ހުސް ސޮންގުން ދިޔައީ ޑިފެންސް ކުރަމުންނެވެ. އެ ހާފުގައި ވެލާ ސްޕޯޓްސް އިން ވަނީ ބެންޗުގައި އިން އިޝާން އިބްރާހީމް (ސައްޓު) ކުޅެން އަރުވައިފަ އެވެ. ސައްޓު އެރުމާ އެކު ވެލާ ސްޕޯޓްސް އިން ހަމަލާތައް ވަރުގަދަކުރި އެވެ.
މެޗުން ބަލިވާން ދަނިކޮށް ވެލާ އިން ނަތީޖާ ހަމަހަމަ ކުރީ މެޗުގެ އިތުރު ވަގުތުގަ އެވެ. އަރިމަތިން ހުސައިން ޝަރީފް (މުޑާ) ނަގައިދިން ހުރަސް ގޯލަށް ވައްދާލީ މުހައްމަދު ފާސިރު (ފާއްޓެ) އެވެ. މެޗުގެ މޮޅު ކުޅުންތެރިޔާގެ މަގާމު ލިބުނީ ހުސް ސޮންގުންގެ ގޯލް ކީޕަރު މުހައްމަދު އިމްރާނަށެވެ.
ޕޮއިންޓެއް ކަށަވަރުކޮށް ސެމީގެ ޖާގަ ލިބުމަކީ ވެލާ ސްޕޯޓްސް އަށް ހިތްހަމަޖެހުމެކެވެ. ވަރުގަދަ ސްކޮޑެއް އެކުލަވާލި ވެލާ ސްޕޯޓްސް އަށް މިފަހަރުގެ މުބާރާތުގައި އެޓީމު ބޭނުންވާ ވަރުގެ ނަތީޖާތަކެއް ނުނެރެވެ އެވެ. ވީ ވެލާ އަތުން މޮޅުވި ނަމަވެސް ދެ ވަނަ މެޗުގައި އިރުމަތި އެފްސީ އަތުން ބަލިވި އެވެ. ކައްކަނީ މެޗުގެ މޮޅާއި މިއަދުގެ މެޗު އެއްވަރުކުރީ ފަހު ވަގުތުގެ ގޯލުތަކުންނެވެ.
ކައްކަނީ އަށް މުބާރާތުގައި ކުރިއަށް ދެވޭނީ މާދަމާ އިރުމަތި އެފްސީ ބަލިކޮށްގެންނެވެ. އޭރުން ޗެމްޕިއަން ހުސް ސޮންގުން މުބާރާތުން ކަޓާނެ އެވެ. މާދަމާގެ މެޗު އެއްވަރުވެއްޖެ ނަމަ ހުސް ސޮންގުންނަށް ސެމީގެ ޖާގައެއް ލިބޭނެ އެވެ.
މާދަމާގެ މެޗު އެއްވަރުކޮށްލައިގެން ވެސް އިރުމަތި އެފްސީ އަށް އެއް ވަނަ ޓީމުގެ ގޮތުގައި ފައިނަލުގެ ސީދާ ޖާގައެއް ކަށަވަރުވާނެ އެވެ.
މިއަހަރުގެ މުބާރާތުގެ ޑިޖިޓަލް ޕާޓްނަރަކީ އުރީދޫ އެވެ. ޓްރާންސްޕޯޓް ޕާޓްނަރަކަށް ފެހި ސްޕީޑް ހަމަޖައްސާފައި ވާއިރު ކިޓް ޕާޓްނަރަކީ ކެޕްޓަން މޯލްޑިވްސް އެވެ.
ޕްރިންޓިން ޕާޓްނަރަކީ އިންކެޑް މޯލްޑިވްސް އެވެ. ބެވަރޭޖް ޕާޓްނަރަކީ ލައިފް ވޯޓާ އެވެ. އިތުރު ސްޕޮންސަރުންގެ ތެރޭގައި މައިލޯ މޯލްޑިވްސް އާއި އަޒްޑިއޮން، އެލް މޯބައިލް އަދި އެމް 7 ހިމެނެ އެވެ.
މުބާރާތުގެ އޮންލައިން މީޑިއާ ޕާޓްނަރަކީ އޭދަފުށި ޓައިމްސް އެވެ.
