ލީގު ބުރުގެ ފަހު މެޗުގައި މިއަދު ހަވީރު 0-3 އިން ކައްކަނީ އެފްސީ ބަލިކޮށް އޭދަފުށި ކަޕް 2024 ގެ ފައިނަލުގެ ފުރަތަމަ ޖާގަ އިރުމަތި އެފްސީ އިން ކަށަވަރުކޮށްފި އެވެ.
އޭދަފުށީ ފުޓްބޯޅަ ސްޓޭޑިއަމްގައި ކުރިއަށްދާ މުބާރާތުގެ ލީގު ބުރުގައި ފަސް ޓީމު ވާދަކުރި އެވެ. އިރުމަތި އެފްސީ އެއްވަނަ ކަށަވަރުކުރީ ހަތަރު މެޗުން 10 ޕޮއިންޓް ހޯދައި ލީގު ބުރުގެ އެއް ވަނަ ޓީމުގެ ގޮތުގަ އެވެ. އެޓީމު ތިން މެޗު ކާމިޔާބު ކުރިއިރު އެއްވަރުވީ މިދިޔަ އަހަރުގެ ޗެމްޕިއަންސް ހުސް ސޮންގުންނާ ދެކޮޅަށް ކުޅުނު މެޗެވެ.
އިރުމަތި އެފްސީ އިން ހުސް ސޮންގުންނާ ދެކޮޅަށް ކުޅުނު މެޗު 0-0 އިން އެއްވަރުވިއިރު ވެލާ ސްޕޯޓްސް ކްލަބާ ވާދަކޮށް 0-1 އިން މޮޅުވި އެވެ. ވީ ވެލާއާ ވާދަކޮށް އިރުމަތި އެފްސީ މެޗު ކާމިޔާބުކުރީ 0-4 އިންނެވެ. މިއަދު 0-3 އިން ކައްކަނީ ބަލިކުރީ ލީގު ބުރުގެ ފަހު މެޗުގަ އެވެ. ލީގު ބުރުގެ ހަތަރު މެޗުގައި ވެސް އެޓީމުގެ ޑިފެންސް ފެނުނީ ވަރުގަދަކޮށެވެ.
މެޗުގެ ފުރަތަމަ ހާފު ނިމުނީ ގޯލެއް ނުޖެހި އެވެ. ދެ ވަނަ ހާފުގެ ކުރީކޮޅު އިރުމަތި އެފްސީ އަށް ލީޑު ނަގައިދިނީ އައްޒާމް އަބްދުﷲ އެވެ. އިރުމަތި ލީޑުގައި އޮއްވައި ވިއްސާރަވެ މެޗު ނުކުޅެވޭ ހާލަތަށް ދިއުމުން ރެފްރީންގެ ޓީމުން މެޗުގެ ކުޅުން މެދުކަނޑާލި އެވެ. މޫސުން ކުޑަކޮށް ރަނގަޅުވުމުން، ކުޅުން ފެށީ ގާތްގަނޑަކަށް 15 ވަރަކަށް މިނެޓު ފަހުންނެވެ.
އިރުމަތި އެފްސީގެ ދެވަނަ ގޯލު ވެސް ޖެހީ މުބާރާތުގައި މޮޅު ކުޅުމެއް ދައްކަމުން އަންނަ އައްޒާމް އެވެ. ފަހު ގޯލު ޖެހީ އަހުމަދު އައިހަމް އެވެ. އައްޒާމަކީ ޓީސީ ސްޕޯޓްސް ކްލަބުގައި މޮޅު ކުޅުމެއް ދެއްކި ކުޅުންތެރިއެކެވެ. އައިހަމް އަކީ ފުޓްބޯޅަ އާއި ފުޓްސަލްގައި ފާހަގަކޮށްލެވޭ މޮޅު ކުޅުންތެރިއެކެވެ.
މެޗުން ބަލިވުމާ އެކު ކައްކަނީ އެފްސީ ވަނީ މުބާރާތުން ކަޓައިފަ އެވެ. ހަތަރު މެޗުން ލިބުނު 4 ޕޮއިންޓާ އެކު އެޓީމަށް ލިބުނީ ހަތަރު ވަނަ އެވެ. ތިން ވަނަ ހޯދީ 6 ޕޮއިންޓް ލިބުނު ހުސް ސޮންގުންނެވެ. ދެ ވަނަ ލިބުނީ 7 ޕޮއިންޓާ އެކު ވެލާ ސްޕޯޓްސް ކްލަބަށެވެ. ފުލަށް ދިޔައީ ހަތަރު މެޗުން ވެސް ބަލިވި ވީ ވެލާ އެވެ.
ފައިނަލުގައި އިރުމަތި އެފްސީއާ ދެކޮޅަށް ނުކުންނާނީ ސެމީ ފައިނަލް މެޗުން މޮޅުވާ ޓީމެކެވެ. އަންނަ ބުދަ ދުވަހު ހަވީރު ކުޅޭ އެ މެޗުގައި ބައްދަލުކުރާނީ ވެލާ ސްޕޯޓްސް އާއި ހުސް ސޮންގުންނެވެ. ފައިނަލް މެޗު ކުޅޭނީ އަންނަ ހުކުރު ދުވަހުގެ ހަވީރު އެވެ.
މިއަހަރުގެ މުބާރާތުގެ ޑިޖިޓަލް ޕާޓްނަރަކީ އުރީދޫ އެވެ. ޓްރާންސްޕޯޓް ޕާޓްނަރަކަށް ފެހި ސްޕީޑް ހަމަޖައްސާފައި ވާއިރު ކިޓް ޕާޓްނަރަކީ ކެޕްޓަން މޯލްޑިވްސް އެވެ.
ޕްރިންޓިން ޕާޓްނަރަކީ އިންކެޑް މޯލްޑިވްސް އެވެ. ބެވަރޭޖް ޕާޓްނަރަކީ ލައިފް ވޯޓާ އެވެ. އިތުރު ސްޕޮންސަރުންގެ ތެރޭގައި މައިލޯ މޯލްޑިވްސް އާއި އަޒްޑިއޮން، އެލް މޯބައިލް އަދި އެމް 7 ހިމެނެ އެވެ.
މުބާރާތުގެ އޮންލައިން މީޑިއާ ޕާޓްނަރަކީ އޭދަފުށި ޓައިމްސް އެވެ.
