މި ސަރުކާރުގެ ޢަމަލުތަކުން ހާމަވަނީ ރާއްޖޭގެ ވެރިކަން ޚުދުމުޚްތާރު ވެރިކަމަކާ ދިމާލަށް މިސްރާބު ޖަހާފައިވާ މަންޒަރު ކަމަށް ކެންދޫ ދާއިރާގެ މެންބަރު މައުރޫފް ޒާކިރު މިއަދު ވިދާޅުވެއްޖެއެވެ.
ރައްޔިތުންގެ މަޖިލީހުގައި މިއަދު ބޭއްވުނު ޖަލްސާގައި މައުރޫފު ވިދާޅުވީ، ސިޔާސީ ޕާޓީތަކުގެ ޤާނޫނަށް ގެނެވޭ އިޞްލާޙާމެދު ވާހަކަދައްކަވަމުން މައުރޫފް ވިދާޅުވި ގޮތުގައި، ރާއްޖޭގައި ހުރި މިނިވަން މުއައްސަސާތަކެއް ރައީސްގެ އަތްދަށަށް ގެންނަ މަންޒަރު ފެނިގެންދާ ކަމަށެވެ.
މި އިޞްލާޙުގެ ދަށުން، ސިޔާސީ ޕާޓީތަކުގެ ޤާނޫނާ ޚިލާފުވާ ފަރާތްތައް 30,000 ރުފިޔާއާއި 75,000 ރުފިޔާއާ ދެމެދުގެ އަދަދަކުން ޖޫރިމަނާކުރެވޭނެއެވެ. އަދި އެ ޢަމަލެއް ހިންގި ފަރާތް ނިސްބަތްވާ ޕާޓީއެއް 100,000 ރުފިޔާއިން ޖޫރިމަނާކުރެވޭނެއެވެ.
ހަމައެއާއެކު މި ދަނޑިވަޅަކީ، އެއްވެސް ސިޔާސީ ޕާޓީއަކުން މާ ބޮޑެތި ގޯސްތަކެއް ހަދަމުންދާ ދަނޑިވަޅެއް ނޫން ކަމަށާއި ޕާޓީތައް 100،000 ރުފިޔާއިން ޖޫރިމަނާ ކުރެވޭ ގޮތަށް އިސްލާހު ގެންނަނީ ކީއްވެގެންތޯ މައުރޫފް ވަނީ ސުވާލު އުފެއްދަވާފައެވެ.
މައުރޫފް ވަނީ ސިޔާސީ ޕާޓީތަކަށް ދައުލަތުގެ ބަޖެޓުން ދޫކުރާ ފައިސާގެ މިންވަރު ބަދަލުކުރާތީ ވެސް ކަންބޮޑުވުން ފާޅު ކުރެއްވާފައެވެ.
މިހާރު ހުށައަޅާފައިވާ އިސްލާހުގެ ސަބަބުން ޕާޓީތަކަށް ލިބެމުން އަންނަ ފައިސާ އިތުރަށް މަދުވެގެންދާނެ. ބޮޑު އަދަދެއް ސިޔާސީ ޕާޓީއެއްގެ ގޮތުގައި ޕީއެންސީއަށް ހޯދުމަށްޓަކައި މި ބަދަލު މި ގެނެވެނީ،
މި އިސްލާހަށް ބަހުސްކުރައްވާ ހަނިމާދޫ ދާއިރާގެ މެންބަރު އަބްދުލްޣަފޫރު މޫސާ ވިދާޅުވީ، ރައްޔިތުން ފޮނި އުންމީދުތަކަކާ އެކީ ގެނައި ސަރުކާރާމެދު މިހާރު ފެންނަނީ ރައްޔިތުން ނާއުންމީދުވާ މަންޒަރުކަމަށެވެ. އެގޮތުން، ކޮރަޕްޝަނާއި ފަސާދަ އެހެން އެއްވެސް ސަރުކާރަކުން ނެތްވަރަށް މި ސަރުކާރުގަ އެބައޮތް ކަމަށް ތުހުމަތުކުރެއްވި އެވެ.
ޣަފޫރު ވެސް ވަނީ މި ސަރުކާރުން މިސްރާބު ޖަހާފައިވަނީ ޚުދުމުހުތާރު ވެރިކަމަކާ ދިމާލަށް ކަމަށް ތުހުމަތުކުރައްވާފައެވެ.
