ބ. އޭދަފުށީގެ ކްލަބް ކޮމްބިނޭޝަން (ސީސީ) އިން 14 އަހަރުން ދަށުންގެ ކުދިންނަށް ބާއްވާ ފުޓްބޯޅަ މުބާރާތެއް މިރޭ ފަށަން ތައްޔާރުވެއްޖެ އެވެ.
“ނަޔާ 14 އަހަރުން ދަށުގެ ފުޓްސަލް ފިއެސްޓާ” ގެ ނަމުގައި ބާއްވާ މި މުބާރާތުގައި 14 އަހަރުން ދަށުގެ ހަތަރު ޓީމު ވާދަކުރާނެ އެވެ. އެ ޓިމުތަކަށް ހިތްވަރު ދިނުމުގެ ގޮތުން މުބާރާތުގައި ކުޅޭ ޖާޒީ ހަދިޔާކޮށްފައިވަނީ ސީސީއިންނެވެ.
މުބާރާތް ފެށުމުގެ ރަސްމިއްޔާތު އޮންނާނީ މިރޭ 20:15ގައި އޭދަފުށީ ފުޓްސަލް ދަނޑުގަ އެވެ.
ސީސީން ބުނިގޮތުގައި މި މުބާރާތަކީ ޒުވާން ކުޅުންތެރިންގެ ހުނަރު ތަރައްޤީކޮށް، ކުޅިވަރުގެ ރޫޙު އާލާކުރުމަށް އަމާޒުކޮށްގެން ބާއްވާ މުބާރާތެކެވެ.
މުބާރާތުގައި ބައިވެރިވާ ކުދިންގެ ފަރާތުން ފެންނާނީ މޮޅު ކުޅުމާއި، ޓީމްވޯކް އަދި ކުޅިވަރަށް އޮންނަ ލޯބި ކަމަށް ކްލަބުން ބުނެފައިވެއެވެ. އަދި މުބާރާތުގެ ސަބަބުން ކުރިމަގުގެ ތަރިންނަށް ވާދަވެރި މާޙައުލެއްގައި އެ ކުދިންގެ ހުނަރު ދައްކާލުމުގެ ފުރުޞަތު ލިބިގެންދާނެ ކަމަށް ވެސް އެ ކްލަބުން ބުންޏެވެ.
މީގެ އިތުރުން މި މުބާރާތަކީ އަރަމުން އަންނަ ޒުވާން ކުޅުންތެރިންގެ ހުނަރު ފާހަގަކޮށް، އެ ކުދިން ކުޅިވަރަށް އޮންނަ ލޯތްބަށް އެހީތެރިވެދިނުމަށް ބާއްވާ މުބާރާތެއް ކަމަށް ސީސީން ބުންޏެވެ.
މި މުބާރާތުގެ ޓައިޓަލް ސްޕޮންސަރަކަށް ރ އަދި ބ. އަތޮޅުގެ ރަށްތަކާ މާލޭއާ ދެމެދު ފެރީގެ ޚިދުމަތް ދެމުން ގެންދާ ނަޔާ ޓްރެވަލްސް އެވެ.، މެއިން ސްޕޮންސަރުންނަކީ އެޓޮލް ކިއުޓް އަދި ފްރެންޑް މީ އެވެ. މީގެ އިތުރުން ވެސް ގިނަ ފިހާރަތަކެއް މި މުބާރާތަށް އެހީވެދެ އެވެ.
