އެގާރަ ވަނަ ގައުމީ ހޭންޑްބޯޅަ މުބާރާތުގެ ދެވަނަޑިވިޝަންގެ ފިރިހެން ޗެމްޕިއަންކަން ޔުޅާދޫ ޔަންގް އީގަލް ސްޕޯޓްސް (ޓިޔެސް) ހޯދައިފި އެވެ.
ޔަންގް އީގަލް އިން ޗެމްޕިއަންކަން ހޯދީ ރޭ ކުޅުނު ފައިނަލް މެޗުގައި 18-16 އިން އޮޑި ސްޕޯޓްސް ކްލަބް ބަލިކޮށްފަ އެވެ.
މިއީ އެޓީމު ފިރިހެން ޑިވިޝަންގެ ފައިނަލަކަށް ދަތުރުކުރި ފުރަތަމަ ފަހަރެވެ. މިދިޔަ ހަފްތާ ކުލުނު ސެމީ ފައިނަލްގައި 28-23 އިން ބުރު ސްޕޯޓްސް ކްލަބް ބަލި ކުރުމާ އެކު އެޓީމު ވަނީ އަންނަ އަހަރުގެ ފުރަތަމަ ޑިވިޝަނަށް ޕްރޮމޯޓް ވެފަ އެވެ.
ގައުމީ މުބާރާތުގެ ދެވަނަ ޑިވިޝަނަށް އެޓީމުގެ ދަށުން އިތުރު ފަސް ޓީމެއް ވަނީ ބައިވެރި ކޮށްފަ އެވެ. އެއީ ފިރިހެން އިތުރު އެއް ޓީމާއި އަންހެން ބައިގައި ހަތަރު ޓީމެވެ. ފިރިހެން ޓީމަކީ އޮސްޕްރޭ ސްޕޯޓްސް އެކަޑަމީ އެވެ.
އަންހެން ޑިވިޝަންގައި ވާދަކުރި ހަތަރު ޓީމަކީ، ފްލައިން އީގަލްސް ސްޕޯޓްސް ކްލަބް، ނައިސް ސްޕޯޓްސް އެކަޑަމީ، ޕްރޯ ސްޕޯޓްސް އެކަޑަމީ އަދި ޕާލްސް އެވެ.
ދެވަނަ ޑިވިޝަންގެ އަންހެން ބައިގައި ޖުމްލަ 26 ޓީމު ބައިވެރި ވެފައި ވާއިރު، ފިރިހެން ބައިގައި 16 ޓީމު ވާދަކުރި އެވެ. ޔަންގް އީގަލްގެ އަންހެން ޓީމު ވަނީ މިދިޔަ އަހަރުގެ ގައުމީ މުބާރާތުގެ ދެވަނަ ޑިވިޝަންގެ ޗެމްޕިއަންކަން ހޯދައިފަ އެވެ.
ތުޅާދޫ ޔަންގް އީގަލް ސްޕޯޓްސް އަކީ ޑިސެމްބަރު 29، 1994 ގައި އުފެދިގެން ކުޅިވަރުތަކުގައި ވާދަ ކުރަމުން އައި ޓީމެކެވެ.
