މިހާރު ކުރިއަށްދާ ނައިންޓީ ޕްލަސް ގޯލްޑް ކަޕް 2024 ގައި މިރޭ މާލެ ސިޓީއާ ވާދަކޮށް 0-5 އިން ތުޅާދޫ ބަލިވެއްޖެ އެވެ.
ތުޅާދޫ ވަނީ ގްރޫޕް ބީގެ ފުރަތަމަ މެޗުގައި އޭދަފުއްޓާ ވާދަކޮށް 1-5 އިން ބަލިވެފަ އެވެ. ދެ މެޗުން ބަލިވުމާ އެކު ގްރޫޕުގައި ކުރިއަށްދާން ތުޅާދޫ އަށް ވަނީ އުނދަގޫވެފަ އެވެ.
ގްރޫޕް ބީގައި ހިމެނޭ އަނެއް ދެޓީމު ކަމަށްވާ އޭދަފުއްޓާއި ތިމަރަފުށި ވާދަކުރާނީ މާދަމާ ހަވީރު އެވެ. މުބާރާތުން ކަޓާނީ ހަތަރު ޓީމުގެ ތެރެއިން ފުލަށް ދާ ޓީމު އެކަންޏެވެ.
ތުޅާދޫ ފަހު މެޗުގައި ނުކުންނާނީ ތިމަރަފުއްޓާ ދެކޮޅަށެވެ. އެ މެޗުން މޮޅުވާން ތުޅާދޫ އަށް މަޖުބޫރުވާނެ އެވެ.
މިރޭގެ މޮޅާ އެކު މާލެ ސިޓީ ވަނީ ގްރޫޕް ސްޓޭޖުގެ ދެވަނަ ބުރުން ފުރުސަތު ހޯދައިފަ އެވެ.
މެޗުގައި މާލޭގެ ފަސް ގޯލުގެ ތެރެއިން ފުރަތަމަ ހާފު ޖެހުނީ ދެ ގޯލެވެ. ފުރަތަމަ ގޯލަކީ ތުޅާދޫގެ ޑިފެންޑަރު ޝަމްވީލް މުހައްމަދު (ބޮންޑާ) އަތުން ބައިކޮޅަށް ވަން ގޯލެވެ. މާލޭގެ ދެވަނަ ގޯލު ޖެހީ މުހައްމަދު ޔަޒްދާން ހަސަން އެވެ.
ދެވަނަ ހާފުގައި މާލޭން ޖެހި ތިން ގޯލުގެ ތެރެއިން ދެ ގޯލު ޖެހީ މުހައްމަދު ނާއިލް އެވެ. އަނެއް ގޯލު ޖެހީ އަހުނަފް މުހައްމަދު އެވެ.
މުބާރާތުގައި 17 ޓީމަކުން ވަނީ ބައިވެރިވެފަ އެވެ. މިހާރު ކުރިއަށްދަނީ ގްރޫޕް ސްޓޭޖުގެ މެޗުތަކެވެ.
