ދުނިޔޭގެ އެހެނިހެން ޤައުމުތަކެކޭ އެއްފަދައިން ރާއްޖޭގައިވެސް މަޤްބޫލުކަން ހޯދާފައިވާ ސޯޝަލް މީޑިއާ ޕްލެޓްފޯމެއް ކަމަށްވާ ޓިކްޓޮކް މެދުވެރިކޮށް ދިވެހިންނަށް އާމްދަނީ ހޯދޭނެ މަގު ފަހިކުރުމަށްޓަކައި ދިވެހި ސަރުކާރާއި ޓިކްޓޮކްގެ އިސްވެރިންގެ ވަފުދަކާ ދެމެދު މަޝްވަރާތައް ފަށައިފިއެވެ.
އިކޮނޮމިކް މިނިސްޓްރީން “އެކްސް” ގައި މިއަދު ކުރި ޕޯސްޓެއްގައި ހާމަކޮށްފައިވަނީ، މިވަގުތު ރާއްޖޭގައި ހުންނެވި ޓިކްޓޮކްގެ އިސް ވަފުދަކާއެކު މިނިސްޓްރީގެ އިސްވެރިން ބައްދަލުކޮށް މަޝްވަރާކޮށްފައިވާ ކަމަށެވެ.
މި މަޝްވަރާތަކުގައި، ޑިޖިޓަލް މޮނެޓައިޒޭޝަންގެ ޒަރީއާއިން ދިވެހިންނަށް ޓިކްޓޮކް މެދުވެރިކޮށް އާމްދަނީ ހޯދޭނެ މަގުތައް ތަނަވަސްކުރުމަށް ހުރި ފުރުޞަތުތަކާ ބެހޭގޮތުން ވާހަކަދެކެވުނު ކަމަށް މިނިސްޓްރީން ފާހަގަކޮށްފައިވެއެވެ.
The TikTok’s senior delegation is with us today in the Maldives. We are working on possible collaboration with this popular global social media network to unlock new avenues for digital monetization. Building a thriving creative economy is a key pledge of President Dr. Muizzu in… pic.twitter.com/37qtSIJQAZ
— Ministry of Economic Development and Trade (@MoEDmv) April 15, 2025
ޗައިނާގެ ޕްލެޓްފޯމެއްކަމަށްވާ ޓިކްޓޮކް ބޭނުންކުރާ ފަރާތްތަކަށް އާމްދަނީ ލިބެމުންދަނީ ކްރިއޭޓަރ ފަންޑް ނުވަތަ ރިވޯޑްސް ޕްރޮގްރާމާއި، ލައިވްސްޓްރީމްތަކުން ލިބޭ ހަދިޔާތަކާއި ބްރޭންޑް ކޮލަބަރޭޝަންތައް ފަދަ ގޮތްގޮތުންނެވެ. އަދި މީގެއިތުރުން، އެކިއެކި ޕްރޮޑަކްޓްތައް ޕްރޮމޯޓްކޮށްގެންނާއި އަމިއްލައަށް އުފެއްދުންތައް ވިއްކައިގެންވެސް އާމްދަނީ ހޯދައެވެ. ބައެއް ބޭނުންކުރާ ފަރާތްތަކުން ޓިކްޓޮކް ޝޮޕް މެދުވެރިކޮށް ސީދާ އެޕްލިކޭޝަން ތެރެއިން އުފެއްދުންތައް ވިއްކައިގެން ނުވަތަ ޕްރޮމޯޓްކޮށްގެންވެސް އާމްދަނީ ހޯދުމުގެ ފުރުޞަތު ލިބިފައިވެއެވެ.
ނަމަވެސް، މިވަގުތު ދިވެހިންނަށް ޓިކްޓޮކް މެދުވެރިކޮށް އާމްދަނީ ލިބެނީ ހަމައެކަނި ލައިވްސްޓްރީމްތަކުން ލިބޭ ހަދިޔާތަކުންނެވެ.
ސޯޝަލް މީޑިއާގެ ގިނަ ޕްލެޓްފޯމްތަކަކީ ރާއްޖޭގައި ވަރަށް މަޤްބޫލް ޕްލެޓްފޯމްތަކެއް ނަމަވެސް، އެހެނިހެން ޤައުމުތަކުގެ ރައްޔިތުންނަށް ލިބިފައިވާ އާމްދަނީ ހޯދުމުގެ ފުރުޞަތުތައް އަދިވެސް ދިވެހިންނަށް ފަހިވެފައެއް ނުވެއެވެ. މިކަން ޙައްލުކޮށް އެފަދަ ފުރުޞަތުތައް ދިވެހިންނަށް ހޯދައިދިނުމަކީ ރައީސް ޑރ. މުޙައްމަދު މުޢިއްޒުގެ ރިޔާސީ ވަޢުދުފުޅެކެވެ.
