ދިރާގުން އަންނަ އަހަރު ނިމުމުގެ ކުރިން މުޅި ރާއްޖެ އަށް 4ޖީގެ ހިދުމަތް ދެނީ

އަންނަ އަހަރު ނިމުމުގެ ކުރިން މުޅިރާއްޖެއަށް 4ޖީ ގެ ހިދުމަތް ދިނުމަށް މަސައްކަތް ކުރަމުން އަންނަ ކަމަށް ދިރާގުން ބުނެފި އެވެ.

ދިރާގުން ބުނީ ރާއްޖޭގެ ހުރިހާ ހިސާބަކަށް 4ޖީ އެލްޓީއީގެ ހިދުމަތް ފޯރުކޮށް ދިނުމަށް ބޮޑު މަޝްރޫއެއް ފަށާފައިވާ ކަމަށާއި، މިހާރު ވެސް ދިރާގުން ރާއްޖޭގެ އާބާދީގެ 60 ޕަސަންޓަށް އެ ހިދުމަތް ފޯރުކޮށްދެމުންދާ ކަމަށެވެ. 4ޖީގެ ހިދުމަތް ފޯރުކޮށްދިނުމަށް ބޭނުންވާ ސިސްޓަމްތަކާއި އެެނިހެން އާލާތްތައް ހޯދުމަށް ދިރާގުން ދެ ކުންފުންޏަކާ އެކު އެއްވުމަކަށް އައިސްފައިވާ ކަމަށްވެސް އެ ކުންފުނިން ބުނެ އެވެ.

ދިރާގުން ބުނީ 4ޖީ އެލްޓީއީގެ ހިދުމަތް ގާއިމްކުރެވުމުން އަތޮޅުތެރޭގެ ރަށްރަށުގައިވެސް ހޯމް ބްރޯޑްބޭންޑުގެ ހިދުމަތް އެތައްގުނައެއް ހަލުއިވެ ފުރިހަމަ ވެގެންދާނެ ކަމަށެވެ. އަދި އެފަދަ ކަންކަމަށް ބޮޑެތި އިންވެސްޓުމެންޓުތައް ކުރުމުގެ މަގުސަދަކީ ދިވެހިންގެ ދިރިއުޅުމާ ގުޅުން ހުރި ކަންކަމަށް ޑިޖިޓަލް ހިދުމަތްތައް މެދުވެރިކޮށް ފުރިހަމަކަން ގެނެސްދިނުން ކަމަށް ދިރާގުން ބުނެ އެވެ.

ދިރާގުގެ ސީއީއޯ އިސްމާއިލް ރަޝީދު ވިދާޅުވީ ދިރާގުގެ އަމާޒަކީ އެންމެ ފުރިހަމަ ބްރޯޑްބޭންޑްގެ ހިދުމަތް މުޅި ރާއްޖެއަށް ފޯރުކޮށްދިނުން ކަމަށާއި، އާބާދީ މަދު ރަށްރަށަށް ވެސް މާލެއެކޭ އެއްފަދައިން ފުރިހަމަ ހިދުމަތެއް ފޯރުކޮށްދިނުން ކަމަށެވެ.

ދިރާގުން 4ޖީގެ ހިދުމަތް މިހާރުވަނީ ހއ. ދިއްދޫ، އައްޑޫ ސިޓީ، ޏ، ފުވައްމުލައް، ގއ. ވިލިނގިލި، ގދ ތިނަދޫ، ޅ. ނައިފަރު، ޅ. ހިއްނަވަރު، ރ.ދުވާފަރު، ލ. މަތިމަރަދޫ، ލ. ތުންޑި، ނ. ވެލިދޫގެ އިތުރުން ދ. ކުޑަހުވަދޫ އަދި ހދ. ކުޅުދުއްފުށީގައި އެ ހިދުމަތް ރަސްމީކޮށް އިފްތިތާހް ކޮށްފަ އެވެ.

ދިރާގު 4ޖީގެ ހިދުމަތް ރާއްޖޭގެ ހުރިހާ ހިސާބަކަށް ފޯރުކޮށްދިނުމުގެ މަސައްކަތް ފަށާފައިވާއިރު، 2015 ވަނަ އަހަރު ރާއްޖޭގެ މީހުން ދިރިއުޅޭ ހުރިހާ ރަށަކަށް 3ޖީ ގެ ހިދުމަތް ފޯރުކޮށްދީފައިވާ ކަމަށް ދިރާގުން ބުނެ އެވެ.