އަލީ ޝަހީމު އަދި ތޯރިގު އަބްދުއްރަހްމާން
ބ. ފެހެންދޫ އާއި އެ އަތޮޅު ގޮއިދުއާ ދެމެދު ދަތުރުކުރި ޑިންގީއެއް ޖެހި އިއްޔެ ހިނގި އެކްސިޑެންޓެއްގައި އަނިޔާވި ހަތަރު މީހުންގެ ތެރެއިން އެކެއްގެ ހާލު އަދިވެސް ސީރިއަސް ކަމަށާއި އޭނާ އަށް އަދިވެސް ހޮސްޕިޓަލުގައި ފަރުވާދެމުން
އަންނަކަމަށް އޭނާގެ އާއިލާއިން ބުނެފި އެވެ.
އިއްޔެ މެންދުރު މި އެކްސިޑެންޓް ހިނގީ ވެލި ނެގުމަށްޓަކައި ގޮއިދޫން ދަތުރުކުރި ޑިންގީއަކާއި ފެހެންދޫން ދެ ޓޫރިސްޓަކު ގޮވައިގެން ދިޔަ ޑިންގީއެއް ޖެހިގެންނެވެ. އެކްސިޑެންޓުގައި ޒަހަމްވީ ދެ ޑިންގީގައި ތިބި ހަތަރު ދިވެހިންނެވެ.
“އީޓީ” އަށް އެނގިފައިވާ ގޮތުގައި މި އެކްސިޑެންޓްގައި އެންމެ ބޮޑަށް އަނިޔާ ލިބުނީ ގޮއިދޫ ކައުންސިލުގެ ރައީސްގެ ބޭބެ އަބްދުލް ހަންނާނު އަށެވެ. އޭނާއަށް ލިބުނު އަނިޔާތަކުގެ ސަބަބުން ވާހަކަދެއްކުމުގައި އުނދަގޫތަކެއް ހުންނަކަމަށާއި އަދި އޭނާގެ ވާތު ފައިވެސް ހަރަކާތް ނުކުރާކަމަށް “އީޓީ” އާ ވާހަކަ ދެއްކި އާއިލާގެ މީހަކު ކިޔައިދިނެވެ.
އާއިލާއިން ބުނީ ހަންނާނުގެ ބޮލަށް ލިބުނު ގެއްލުންތައް ބެލުމަށް އެމްއާރުއައި ހަދަން ތައްޔާރުވަމުން އަންނަ ކަމަށެވެ.
ޑިންގީ އެކްސިޑެންޓްގައި ދެން އަނިޔާ ލިބުނީ ގޮއިދޫ ލިލީވިލާ، އަހްމަދު މަޖީދު އަށާއި އެރަށު އައްސޭރި، ހަސަން ޔާސިރުގެ އިތުރުން ހދ. ނެއްލައިދޫ، އަހްމަދު ނާސިހު އަށެވެ. މި ތިން މީހުންނަށްވެސް އައިޖީއެމްއެޗުގައި ފަރުވާ ދިނުމަށްފަހު މިހާރުވަނީ ދޫކޮށްލައިފަ އެވެ.
