ވެސްޓް ވިންގްސް އޭދަފުށީގެ ނަމުގައި މުޅިން އާ ޖަމިއްޔާއެއް އިފްތިތާހް ކޮށްފިއެވެ.
ކުރިން ހުސް ސޮގުންގެ ނަމުގައި ހަރަކާތްތެރިވި އޭދަފުށީ ހުޅަނގު އަވަށަށް ނިސްބަތްވާ ޒުވާނުންގެ ގްރޫޕަކުން މިނަމުގައި ޖަމިއްޔާ ރަސްމީކޮށް އިފްތިތާހް ކޮށްފައިވަނީ މިރޭ އޭދަފުށީ ހުޅަނދު ސަރަހައްދުގައި ބޭއްވި ހަފްލާއެއްގަ އެވެ.
މި ހަފްލާގައި ވެސްޓް ވިންގްސް އޭދަފުށި ޖަމިއްޔާއިން ވަނީ ވޭތުވެދިޔަ އަހަރުތަކުގައި ކޮށްފައިވާ މަސައްކަތްތަކާއި ލިބިފައިވާ ކާމިޔާބީތަކުގެ ޕްރެސެންޓޭޝަނެއް ހުށަހަޅާފައެވެ. މީގެ އިތުރުން އަލަށް ތަޢާރަފް ކުރެވުނު ޖަމިއްޔާގެ ލޯގޯ ވަނީ
ލޯންޗު ކޮށްފައެވެ. އެ ޖަމިއްޔާގެ އިސް މެމްބަރަކު “އީޓީ” އާ ވާހަކަދައްކަމުން ބުނީ ވެސްޓް ވިންގްސް ގެ ފަރާތުން ކުރިއަށް އޮތް އަހަރުތަކުގައި އޭދަފުށީގައި ބާއްވާ ހުރިހާ ކުޅިވަރު މުބާރާތްތަކުގައި ވާދަކުރާނެ ކަމަށެވެ.
” އަޅުގަނޑުމެން އިރާދަކުރެއްވިއްޔާ އޭދަފުށީގައި ބާއްވާ ހުރިހާ ކުޅިވަރު މުބާރާތެއްގައި ބައިވެރިވާނަން. މީގެ އިތުރުން ރަށަށް ކުރިއެރުން ލިބޭ ކޮންމެ ކަމެއްގަ ރަށު ކައުންސިލުގެ އިތުރުން އެހެނިހެން މުއައްސަސާތަކާ ގުޅިގެންވެސް މަސައްކަތް ކުރާނެކަމުގެ ޔަގީންކަން ދެން. އަދި އިޖްތިމާއީ ގޮތުންވެސް ޖަމިއްޔާގެ ފަރާތުން ކުރިއަށް އޮތް އަހަރުތަކުގައި ކަންކަން ރާވާނަން “
މީގެ އިތުރުން މި ހަފްލާގައިވަނީ މިނިވަން ފަންސާން ފުޓްބޯޅަ މުބާރާތް ކާމިޔާބު ކުރި އޭދަފުށީ ފުޓްބޯޅަ ޓީމަށް މަރުހަބާ ކިއުމުގެ ގޮތުން ހާއްސަ ޕްރެސެންޓޭޝަނެއް ދައްކާފައެވެ. އަދި ވެސްޓް ވިންގްސް ޖަމިއްޔާގެ ފުޓްބޯޅަ ޓީމުން މި އަހަރު ބޭނުންކުރާނެ ޖޯޒީވެސް ވަނީ ދައްކާލާފައެވެ.
ބާބަކިއުއާއެކު އަދި އޭދަފުށީ ޑައުންޓަނުން ބޮޑުބެރު ގްރޫޕުގެ ބައިވެރިވުމާއެކު ކުރިއަށް ގެންދިޔަ މި ހަފްލާގައި އެ ޖަމިއްޔާއަށް ނިސްބަތްވާ ގިނަ ބަޔަކު ވަނީ ބައިވެރިވެފައެވެ.
