ކުޑަކުދިން އިނގިރޭސި ބަހަށް އަހުލުވެރިކުރުވަން “އިންގްލިޝް ފޯ ޔަންގް ލާނާސް” (ވައިއެލްއީ) ގެ ނަމުގައި މައި ކޮލެޖުން އޭދަފުށީގައި ހާއްސަ ޕްރޮގްރާމެއް މިއަދު ފަށައިފި އެވެ.
މިއަދު ހަވީރު އޭދަފުށީ ދެނުކު ފަރާތު ހިއްކި ބިމުގައި ބޭއްވި ކުޅިވަރު ހަރަކާތްތަކެއްގެ ތެރެއިން މި ޕްރޮގްރާމު ފައްޓަވައިދެއްވީ މައި ކޮލެޖުގެ ރެކްޓަރ ޑރ. އާމާލް އަލީ އެވެ.
މައި ކޮލެޖު އޭދަފުށީ އައުޓް ރީޗް ސެންޓަރުގައި އޮކްޓޯބަރު މަހުގެ ނިޔަލަށް މި ޕްރޮގްރާމު ކުރިއަށް ގެންދާނެ އެވެ.
އުމުރުން 6 – 10 އަހަރާ ދެމެދުގެ ކުދިންނަށް އަމާޒުކޮށްގެން މިއަދު ފެށި މި ކްލާސްތަކުގައި 50 އަށް ވުރެ ގިނަ ކުދިން ބައިވެރިވެފައިވާ ކަމަށް އެ ކޮލެޖުގެ އޭދަފުށީ އައުޓް ރީޗު ސެންޓަރުން ބުންޏެވެ.
މައި ކޮލެޖުގެ ބްރާންޗެއް އޭދަފުށީގައި ހުޅުވީ މިދިޔަ އަހަރުގެ ޖެނުއަރީމަހު އެވެ. އެ ކޮލެޖުން އޭދަފުށީގައި އަންނަނީ ޑިޕްލޮމާ އަދި ޕޯސްޓް ގްރެޖުއޭޓް ކޯސްތައް ހިންގަމުންނެވެ.