ބޭންކް އޮފް މޯލްޑިވްސް (ބީއެމްއެލް) އިން ގެދޮރު އިމާރަތްކުރާ މީހުންނަށް ޚާއްސަ އިސްލާމިކް ސްކީމެއް ތައާރަފްކޮށްފި އެވެ.
ބީއެމްއެލް އިސްލާމިކް އިން ތައާރަފް ކުރި މި ސްކީމްގެ ދަށުން ގެދޮރު އިމާރަތްކުރުމުގައި ދަތިކަން ލިބިފައިތިބި ފަރާތްތަކުގެ ޕްރޮޖެކްޓުގެ %80 ބޭންކުގެ ޚަރަދާއެކު ނިންމައިދެވޭނެ އެވެ.
ބީއެމްއެލް އިސްލާމިކްގެ ޑައިރެކްޓަރު ޒުލްގަރުނައިން ތަމަން ވިދާޅުވެފައިވަނީ މި ސްކީމާއެކު ގެދޮރު ހަދަން ފައިސާ ނެތް މީހުންނަށް ވަރަށް ބޮޑު ހައްލެއް ލިބިގެންދާނެ ކަމަށެވެ.
މި ސްކީމްގެ ދަށުން ބޭންކުން ގެދޮރު ހަދައިދިނުމުން އަނބުރާ ބޭންކަށް ފައިސާ ދައްކަން 20 އަހަރުގެ މުއްދަތެއް ލިބިގެންދާނެއެވެ. އަދި ފައިސާ ދައްކާއިރު ޕްރޮފިޓް ރޭޓުގެ ގޮތުގައި 9.5 ނުވަތަ %10.5 އިތުރަށް ކަސްޓަމަރުން ދައްކަން ޖެހޭނެ އެވެ.
ފުޅާ ދާއިރާއެއްގައި އިސްލާމިކް ބޭންކިންގގެ ޚިދުމަތް ބީއެމްއެލް އިން ކަސްޓަމަރުންނަށް ފޯރު ކޮށްދެމުންދާއިރު މިސްކީމުގެ ދަށުން ވަރަށް ގިނަ ބަޔަކަށް ގެދޮރު އިމާރާތްކުރުމާއި އާބާތުރަފިލުވުމަށް މަންފާ ކުރާނެއެވެ.
ބީއެމްއެލް އިސްލާމިކްގެ އިތުރު ޚިދުމަތްތަކަށް ބަލާއިރު ‘ވަދީޢާ’ ގެ ނަމުގައި އެކި ފަރާތްތަކަށް އެކައުންޓު ހުޅުވައިދެއެވެ. އަދި ‘ބީއެމްއެލް އިސްލާމިކް ވިސާ ޑެބިޓް ކާޑު’ ގެ ނަމުގައި ކޭޝް ކާޑެއްވެސް ކަސްޓަމަރުންނަށް ލިބެ އެވެ.
