ބ. އޭދަފުށީ ބޮޑެތި މަގުތަކުގެ މެދުގައި ހައްދާފައި ހުރި ހިޔާދޭ ބޮޑެތި ގަސްތައް ކަނޑަން ފަށައިފި އެވެ.
ބިޔަކޮށް ހެދިފައިވާ ހިޔާ ދޭ އެ ގަސްތައް ކަނޑަމުން ގެންދަނީ ތާރު އެޅުމަށްޓަކައި މަގު ހެދުމުގެ މަސައްކަތް ކުރުމަށެވެ. އެގޮތުން އިއްޔެ މިރަށު ބޮޑު މަގު ބާ އިންޖީނުގޭ ކައިރީ ހުރި ހިރުނދުގަސް ކަނޑާލިއިރު، މިދިޔަ އަހަރުގެ ފަހުކޮޅު ވަނީ އޭދަފުށީ އުރީދޫ ފިހާރަ ކައިރި ހަތަރު އަނގޮޅި މެދަށްވާ ގޮތަށް ބިޔަކޮށް ހެދިފައިހުރި ގަސްވެސް ކަނޑާލައިފަ އެވެ.
އެ ގަސްތައް ކަނޑަމުން އަންނައިރު ރަށުގެ މައި މަގު މިހާރު ފެންނަނީ ވަރަށް ބޮޑަށް އަވި ދީފައި ވަނިކޮށެވެ. އެ ގަސްތަކުގެ ސަބަބުން އެ ހިސާބު ގަނޑަށް ކުރިން ވަރަށް ބޮޑަށް ފެހިކަން ލިބި ހިޔާ ދެ އެވެ.
އޭދަފުށީ ކައުންސިލުގެ މެންބަރު މުހައްމަދު ރިޒާ ވިދާޅުވީ މަގުހަދާއިރު ތާރުއަޅާ މަގުތަކުގެ މެދުގައި ހުރި ހުރިހާ ގަސްތަކެއްވެސް އެއްކޮށް ނަގާނެ ކަމަށެވެ. ނަމަވެސް ތާރު އަޅައި ނިމޭއިރު ބޮޑެތި މަގު ތަކުގެ ދެ ފަރާތުގައި ގަސް އިންދޭނެ ގޮތަށް ހުންނާނެ ކަމަށްވެސް ރަށު ކައުންސިލުން ބުންޏެވެ.
“މިހާރު އެ ހުރިގޮތަށް މަގުގެ މެދުގައި ގަސްތައް ބަހައްޓައިފި ނަމަ ދުއްވާ އެއްޗެހި ދުއްވުމުގައި ވަރަށް ބޮޑެތި ދަތިތަކާ ކުރިމަތިވާނެ. އެއީ މަގުގެ ދެފަރާތުންވެސް ޕޭމަންޓް އިންނާތީ އެވަރުގެ ޖާގަ ނުލިބޭނެ. ނަމަވެސް ދެ ފަރާތުގައި ގަސް އިންދޭނެ ގޮތަށް ޑިޒައިން ކޮށްފައިވަނީ،” ރިޒާ ވިދާޅުވި އެވެ.
އެކަމަކު ހިޔާދޭ ބޮޑެތި ގަސްތަކެއް ކަނޑަމުން ގެންދާތީ ބައެއް މީހުން އެކަމާ ހިތްހަމަނުޖެހިގެން އެ ވާހަކަ ދައްކަ އެވެ.
ގަސް ކަނޑައިގެން ތަރައްގީ ގެނެވޭނީ (: