ރާއްޖޭގައި ފެތުރެމުންދާ އެޗް1އެން1 ވައިރަހުން ރައްކާތެރިވުމަށްޓަކައި ދިރާގުގެ ހުރިހާ މުވައްޒަފުންނާއި މުވައްޒަފުންގެ އާއިލާތަކަށް އިންފުލުއެންޒާ ވެކްސިން ޖެހުމުގެ އިންތިޒާމު އެ ކުންފުނިން ހަމަޖައްސައިފި އެވެ.
ދިރާގުން މިއަދު ބުނީ ދިރާގުގެ މުވައްޒަފުންނާއި މުޅި މުޖުތަމައުގެ ދުޅަ ހެޔޮކަމާއި ރަނގަޅު ސިއްހަތަކީ އެ ކުންފުނިން ނުހަނު އިސްކަން ދޭ ކަމެއް ކަމަށެވެ.
އިންފުލުއެންޒާ ވެކްސިން ޖެހުމުގެ ހަރަކާތް ދެ ދުވަހަކަށް ބަހާލައިގެން ދިރާގުގައި ކުރިއަށް ދާނެއެވެ. އެގޮތުން އިއްޔެ، ވަނީ މުވައްޒަފުންނާއި އާއިލާއަށް ދިރާގު ހެޑް އޮފީހުން ވެކްސިން ޖަހައިދީފަ އެވެ. އަދި ސެނަހިޔާ ހޮސްޕިޓަލާ ގުޅިގެން އިއްޔެ އެ ހޮސްޕިޓަލުގައި މުވައްޒަފުންގެ ތިން އަހަރުން ދަށުގެ ހުރިހާ ކުދިންނަށް ވަނީ ވެކްސިން ޖެހުމުގެ އިންތިޒާމު ހަމަޖައްސާފަ އެވެ. ދެން ވެކްސިން ޖެހުން އޮންނާނީ މާދަމާ ދިރާގު ހެޑް އޮފީހުގަ އެވެ.
މީގެ ދުވަސް ކޮޅެއް ކުރިން ދިރާގުގެ ހެޑް އޮފީހުގައި މުވައްޒަފުންނަށް އެމްއެމްއާރް ވެކްސިން ޖެހުމުގެ އިންތިޒާމު ވެސް ދިރާގުން ވަނީ ހަމަޖައްސާފައެވެ. މީގެ އިތުރުން އެޗް1އެން1 ވައިރަހާ ބެހޭ މައުލޫމާތު ފޯރުކޮށްދިނުމަށް މޯލްޑިވްސް ރެޑް ކްރެސެންޓުން އިންތިޒާމު ކުރި ކޯލް ސެންޓަރ ގާއިމު ކުރުމަށްވެސް ދިރާގުން ވަނީ އެހީތެރިކަން ފޯރުކޮށްދީފައެވެ.
