ބޮލީވުޑްގެ މަޝްހޫރު ކޯރިއޯގްރާފަރު އަދި ޑައިރެކްޓަރު ފަރަހަ ޚާން އޭނާގެ އެއްމާބަނޑު ތިން ކުދިންނާއެކު މިހާރު ސޮނެވާފުށި ރިސޯޓުގައި ޗުއްޓީ ހޭދަކުރަމުން އެބަދެއެވެ.
ފަރަހަ ރާއްޖެ އައިސް ކުރި ފުރަތަމަ ޓުވީޓްގައި ވަނީ އޭނާގެ ތިން ދަރިން ސްވިމިންޕޫލް ކައިރީގައި ތިއްބާ ނަގާފައިވާ ފޮޓޯއެކެވެ. އަދި އޭނާގެ ކޮޓަރި ބަންގްލޯއެއްހާ ބޮޑުކަމަށް ފަރަހަ ސިފަ ކޮށްފައިވެ އެވެ.
އޭނާގެ ދެ ވަނަ ޓުވީޓް ކޮށްފައިވަނީ އިއްޔެ އެވެ.
“މަންމައަކަށް ވީތީ އެކަނިވެލާނެ ވަގުތުކޮޅެއް ވެސް ބޭނުންވާނެކަން ކޮންމެ މީހަކަށް ވެސް އެނގޭނެ. ނަމަވެސް ހުސް ވަގުތުކޮޅެއް ލިބޭއިރަށް ދަރިން މަތިން ހަނދާންވާން ފަށާ. އެހެންވެ މި އުޅެނީ ކުދިން ހޭލައްވާލަން،” ފަރަހަ ބުނެފައިވެ އެވެ.
މި ޓުވީޓާ އެކު އޭނާ ޕޯސްޓްކޮށްފައިވާ ފޮޓޯއިން ދޭހަވަނީ އެއީ ހެނދުނުގެ ވަގުތު ކަމެވެ. ކޮފީއަކާއި އައިނު އަދި ވާހަކަ ފޮތެއް ފެންނަ ގޮތަށް ކޮޓަރިން ބޭރު ފެންނަން އޮތް މަންޒަރު އެ ފޮޓޯއިން ފެނެ އެވެ.
އަދި އިއްޔެ ހަވީރު ކޮށްފައިވާ ޓުވީޓެއްގައި ފަރަހަ ބުނެފައިވާ ގޮތުގައި ފަޅު ރަށަކަށް ޕިކްނިކް ދިއުމަކީ ކޮންމެހެން ކުރަން ޖެހޭ ކަމެކެވެ.
“ދެން ފަހަރަކުން އެކަމަކު ޓޮމް ކްރޫޒް ވެސް އަހަންނާ އެކު މި ރަށުގައި ހުންނަން ބޭނުންވޭ،” ފަރަހަ ލިޔެފައިވެ އެވެ. މިފަހަރު ޕޯސްޓްކޮށްފައި ވަނީ ފަރަހަ އާއި އޭނާގެ ތިން ދަރިން މޫދު ކައިރީގައި ތިބެ ނަގާފައިވާ ފޮޓޯއެކެވެ.
ފަރަހަގެ މި ޓުވީޓަށް ޖަވާބު ދިން އެކަކީ ކުރީގެ މަޝްހޫރު ފިލްމީ ތަރިއެއް ކަމަށްވާ ޝަބާނާ އަޒްމީ އެވެ. “ވަރަށް ރީތި ދޯ” އޭ ޝަބާނާ އަހާފައިވެ އެވެ. ޖަވާބުގައި ފަރަހަ ބުނެފައިވަނީ ލޯ ތަރަތަރަ ޖަހައިގެންދާހާ ރީތި ކަމަށެވެ. އަދި ޝަބާނާ ވެސް އައުމަށް އޭނާ ދައުވަތު ދީފައިވެ އެވެ.
