ކަށީގެ ބަލިތަކަށް ހާއްސަ ޑރ ޔޫސުފް ޝާންގެ ވަރަށް ހާއްސަ މެޑިކަލް ކޭމްޕެއް މިމަހު އޭދަފުށީ މެޑިކަލް ސެންޓަރުގައި ބާއްވަން ނިންމައިފި އެވެ.
ޑރ ޝާން އަކީ ކަށީގެ ބޮޑެތި އޮޕަރޭޝަން ތަކާއި ކަށްޓަށް ދިމާވާ ތަފާތު މައްސަލަތަކަށް ފަރުވާދެއްވުމަށް ރާއްޖޭގައި މިވަގުތު ހުންނެވި އެންމެ މޮޅު އެއް ޑޮކްޓަރެވެ. ޝާން ޝެޑިއުލްކޮށް ކޮންމެ ދެ މަހުން އެއްފަހަރު އޭދަފުށީ މެޑިކަލް ސެންޓަރަށް ދަނީ ޒިޔާރަތް ކުރަމުންނެވެ. އެގޮތުން މިއީ އެ ސެންޓަރަށް ޝާން މިއަހަރު ޒިޔާރަތްކުރާ ދެވަނަ ފަހަރެވެ.
އޭދަފުށީ މެޑިކަލް ސެންޓަރުން ބުނިގޮތުގައި ޑރ ޝާންގެ މެޑިކަލް ކޭމްޕް ބޭއްވުމަށް ހަމަޖެހިފައިވަނީ ވީހާވެސް ގިނަ ބަޔަކަށް ހިދުމަތް ފޯރުކޮށް ދިނުމުގެ މަގްސަދުގަ އެވެ.
އޭދަފުށީ މެޑިކަލް ސެންޓަރުގެ އޮފިސަލް ވިދާޅުވީ އަތޮޅުތެރޭގެ ގިނަ މީހުންނަށް ދިމާވެފައިވާ އެންމެ ބޮޑު ގޮންޖެހުމަކީ ޑރ ޝާން އަށް އެޕޮއިންޓްމެންޓް ހޯދުމެވެ. އެހެންވެ އެ ސެންޓަރުން މަސައްކަތްކުރައްވަނީ އެ މައްސަލައަށް ލުޔެއް ހޯދައި ދިނުމަށްކަމަށް އޭނާ ވިދާޅުވި އެވެ.
އޭދަފުށީ މެޑިކަލް ސެންޓަރުން ބުނި ގޮތުގައި އެ ސެންޓަރުން މިފަދަ ކޭމްޕުތައް ބޭއްވުމުގެ އެންމެ ބޮޑު ބޭނުމަކީ، ރައްޔިތުން މާލެ ދިއުމަށްޓަކައި އުފުލާ ބުރަތަކާއި މާލޭގައި ސިއްހީ ޚިދުމަތްތައް ހޯދުމަށްޓަކައި ކުރަންޖެހޭ ހޭދަތައް ނުކޮށް، އަމިއްލަ ރަށުގައިތިބެ، އެ ޚިދުމަތް ފޯރުކޮށްދިނުމެވެ. އަދި މިއީ ރައްޔިތުންނަށް ގާތުން ޚިދުމަތް ދިނުމަށް ބާއްވާ ކޭމްޕުތަކެއް ކަމަށް ވެސް އެ ސެންޓަރުން ބުންޏެވެ.
އޭދަފުށީ މެޑިކަލް ސެންޓަރުން ޑރ. ޝާން އަށް ދެއްކުމަށް ނަން ނޯޓް ކުރަން ގުޅަން ޖެހެނީ 9631111، 7523242 އަށެވެ.
