ރަމަޟާން މަހާއި ދިމާކޮށް ސައުދީ އަރަބިއްޔާގެ ރަސްގެފާނު ސަލްމާން އަބްދުލް އަޒީޒް ރާއްޖެއަށް ހަދިޔާ ކުރެއްވި ކަދުރުގެ ތެރެއިން އޭދަފުށީ ރައްޔިތުންނަށް ބެހުމަށް ލިބުނު ކަދުރުތައް ރަށު ކައުންސިލުން މިއަދު ބަހަން ފަށައިފި އެވެ.
ރަށުކައުންސިލުން ބުނިގޮތުގައިި އޭދަފުށީ ރައްޔިތުންނަށް ބެހުމަށް މިއަހަރު 576 ޕެކެޓް ކަދުރު ލިބިފައިވެ އެވެ.
އަދި މީހުން ދިރިއުޅޭ ކޮންމެ ގެއަކަށް ދޫކުރުމަށް ހަމަޖެހިފައިވަނީ ކަދުރު (1ކިލޯ ގްރާމުގެ) ޕެކެޓެކެވެ.
އޭދަފުށީ ކައުންސިލުން ބުނީ ރަސްމީ ބަންދު ނޫން ދުވަސްތަކުގައި ހެނދުނު 10:00 އިން 2:00 އަށް ކަދުރު ދޫކުރާނެ ކަމަށެވެ.
އޭދަފުށީގައި މިއަދު ކަދުރު ބަހަން ފަށާއިރު ކަދުރުތައް މިރަށަށް ކަދުރު ލިބުނީ މިދިޔަ ހަފްތާ ތެރޭގަ އެވެ. މީގެ ކުރީގެ އަހަރުތަކުގައި ރޯދަމަސް ކުރީކޮޅު ކަދުރު ބެހިނަމަވެސް މިފަހަކަށް އައިސް ރައްޔިތުންނަށް ކަދުރު މި ލިބެނީ ރޯދަމަހުގެ ބޮޑުބައެއް ފާއިތުވެދާ ފަހުންނެވެ.
ކޮންމެ އަހަރެއްގެ ރޯދަ މަހާ ދިމާކޮށް ވެސް ސައުދީން ރާއްޖެ އަށް ކަދުރު ހަދިޔާ ކުރެ އެވެ. އެގޮތުން މިއަހަރު ވެސް 50 ޓަނުގެ ކަދުރު ސައުދީން ރާއްޖެ އަށް ހަދިޔާ ކުރި އެވެ.