ޗައިނާގެ ޒިއާންޖީ ކޮލެޖް އޮފް ފޮރިން ސްޓަޑީޒްއިން ކުރިއަށް ގެންދިއުމަށް ހަމަޖެހިފައިވާ ސެމިނާއެއްގައި ބައިވެރިވުމަށް އޭދަފުށީ ކައުންސިލުގެ ރައީސް ތޮލާލު އަބްދުއްރަހްމާން މިރޭ ޗައިނާއަށް ފުރާވަޑައިގެންފި އެވެ.
“ސެމިނާ އޮން މެނޭޖްމަންޓް ކެޕޭސިޓީ ފޯ ލޯކަލް ކައުންސިލްސް” ގެ ނަމުގައި ބާއްވާ މި ސެމިނާގައި ތޮލާލު ބައިވެރިވެވަޑައިގަންނަވަނީ ރާއްޖޭގެ ރަށްރަށުގެ ކައުންސިލަރުންގެ ތެރެއިން ހޮވާލެވުނު 10 ބޭފުޅުންގެ ތެރޭގައި ހިމެނިގެންނެވެ. ކައުންސިލަރުންގެ އިތުރުން އެލްޖީއޭ އާއި ރައީސް އޮފީހުގެ ބޭފުޅުންވެސް މި ސެމިނާގައި ބައިވެރިވެ ވަޑައިގަންނަވަ އެވެ.
ޖުލައި 1 އިން 21 ގެ ނިޔަލަށް ކުރިއަށްގެންދާ މި ސެމިނާގެ ބައިވެރިން ޗައިނާގެ ބައެއް ސިޓީ ތަކުގެ އިތުރުން ޕްރޮވިންސްތަކަށް ޒިޔާރަތްކުރުމަށްވަނީ ހަމަޖެހިފަ އެވެ.
އެލްޖީއޭ އިން ބުނިގޮތުގައި މި ޕްރޮގްރާމުގައި ބައިވެރިވުމަށް ރަށު ކައުންސިލްތަކަށް ޚާއްޞަ ކުރެވުނު ފުރުސަތުތަކަށް ކައުންސިލްތައް ހޮވާފައިވަނީ އެންމެ ފަހުގެ “ލޯކަލް ކައުންސިލްސް ޕާރފޯމެންސް އިންޑެކްސް” އިން އެންމެ މަތިން ރޭންކް ކުރެވުނު ރަށު ކައުންސިލްތަކެވެ. އެގޮތުން މި ޕްރޮގްރާމުގައި ބައިވެރިވާ ރަށު ކައުންސިލްތަކަކީ ށ. މަރޮށި، ށ.ފުނަދޫ ، ރ. ވާދޫ، ރ. އުނގޫފާރު، ބ.އޭދަފުށި، ކ.ހުރާ، ކ.ގުރައިދޫ، ކ.ގުޅި އަދި ގދ. ތިނަދޫ ރަށު ކައުންސިލެވެ.
