ބ. ހިތާދޫ ސްކޫލުގައި އިމާރާތް ކުރި 2 ބުރީގެ އާ އިމާރާތް އެ ސްކޫލާ ހަވާލުކޮށްފި އެވެ.
ވޯލްޑް ބޭންކާއި ސަރުކާރާއި ގުޅިގެން ކުރިއަށް ގެންދާ “އެންހޭންސް އެޑިޔުކޭޝަން ޑިވެލޮޕްމަންޓް ޕްރޮޖެކްޓް” ދަށުން ހިތާދޫގައި ގާއިމުކުރި ދެ ބުރީގެ އާ އިމާރާތުގައި 6 ކްލާސްރޫމް ހިމެނެއެވެ.
އެ އިމާރާތް ހިތާދޫ ސްކޫލާ ހަވާލުކޮށްދެއްވީ ހިތާދޫ ކައުންސިލުގެ ރައީސް އަބްދުﷲ އަޒީޒު އެވެ. ސްކޫލުންް ހަވާލުވެވަޑައިގަތީ އެ ސްކޫލުގެ ޕްރިންސިޕަލް އަބްދުﷲ ހަފީޒު ޚާލިދު އެވެ.
ހިތާދޫ ސްކޫލުން ބުނި ގޮތުގައި 6 ކްލާސްރޫމްގެ އާ އިިމާރާތުގައި އަންނަ ހަފްތާތެރޭ ކިޔައިދޭން ފެށޭވަރު ވާނެ އެވެ. އަދި މިއީ ޒަމާނީ ޑިޖިޓަލް ވަސީލަތްތައް ބޭނުން ކޮށްގެން ކިޔަވައިދެވޭނެ ފެންވަރަށް ތައްޔާރުު ކޮށްފައިވާ ކްލާސްރޫމްތަކެއް ކަމަށްވެސް އެ ސްކޫލުން ބުނެއެވެ.
ވޯލްޑް ބޭންކް ހިލޭ އެހީގެ ދަށުން ބ. ތައުލީމީ މަރުކަޒުގައި މިހާރު އިމާރާތް ކުރާ ހަތަރުބުރީގެ 12 ކްލާސް ރޫމަކީވެސް މި ޕްރޮޖެކްޓްގެ ދަށުން ކުރިއަށްދާ މަޝްރޫއެކެވެ. އެ އިމާރާތުގައި މިހާރު ކުރިއަށްދަނީ ފިނިޝިން މަސައްކަތްތަކެވެ.
