އަންނަ ބޮޑު އީދު ދަރަވަންދޫގައި ކުލަގަދަކޮށް ފާހަގަކުރަން އެރަށު ކައުންސިލުން ތައްޔާރުވެއްޖެ އެވެ.
ދަރަވަންދޫ ކައުންސިލުގެ ރައީސް އަލީ މާިދު ވިދާޅުވީ، ކައުންސިލުން އިސްނަގައިގެން ރައްޔިތުންނާ ގުޅިގެން މިފަހަރުގެ ބޮޑު އީދު ވެސް އެރަށުގައި ވަރަށް ކުލަގަދަކޮށް ފާހަގަކުރުމަށް ތައްޔާރުވަމުން އަންނަ ކަމަށެވެ.
އެގޮތުން އީދު ކުޅިވަރުތަކަށް ފައިސާ ހޯދުމުގެ ގޮތުން ފަންޑް ރައިސް ކުރުމަށް މިރެއާ މާދަމާރޭ އެރަށުގައި ހާއްސަ މިއުޒިކް ޝޯތަކެއް އޮންނާނެ ކަމަށް އޭނާ ވިދާޅުވި އެވެ.
ދަރަވަންދޫ ކައުންސިލުން ބުނީ ފަޖުރުތަރި 2 ގެ ނަމުގައި ބާއްވާ އެ ޝޯ ތަކަށް އާއްމުންގެ ވަރަށް ބޮޑު ތަރުހީބެއް ލިބިފައިވާ ކަމަށެވެ.
މާޖިދު ވިދާޅުވި ގޮތުގައި އަންނަ ބޮޑު އީދު އެރަށުގައި މިއުޒިކް ޝޯގެ އިތުރުން ތަފާތު ކުޅިވަރުތަކާ އެކު ސަގާފީ ގިނަ ހަރަކާތްތަކެއް ބާއްވަން ވަނީ ރާވާފަ އެވެ.
އޭނާ ވިދާޅުވީ، ކައުންސިލުން އިސްނަގައިގެން ދަރަވަންދޫގައި ކުލަގަދަކޮށް އީދު ފާހަގަކުރަން ނިންމީ ރާއްޖޭގައި ކުރިން ފެންނަމުން ދިޔަ ޢީދު ކުޅިވަރުތައް މިހާރު އުވެމުންދާތީ އެފަދަ ކަންކަން އާލާކޮށް ދިރުވައި، އާންމުންނާއި ކުޑަކުދިންނަށް އީދުގެ އުފާ ފުރިހަމައަށް ހޯދައިދިނުމަށް ކަމަށެވެ.
ކަލަންޑަރުގައިވާ ގޮތުން އީދު ދުވަހަކީ އަންނަ ސެޕްޓެމްބަރު މަހުގެ 1 ވަނަ ދުވަހެވެ.