އޭދަފުށީގެ ކޮންމެ މީހަކަށް ރުކެއް އިންދުމުގެ ގްރޮގްރާމެއް މުޅި ރާއްޖެ އަށް މަޝްހޫރު އަދި އެންމެންގެ އިތުބާރު ލިބިފައިވާ އިލެކްޓްރޯނިކް ފިހާރައެއް ކަމަށްވާ އޭޖޭއީ އެމްޕޯރިއަމް އިން މިއަދު ފަށައިފި އެވެ.
“މަށަށް ވެސް ރުކެއް – ބ. އޭދަފުށި” މި ޝިއާރުގެ ދަށުން ކުރިއަށް ގެންދިއުމަށް ހަމަޖެހިފައިވާ މި ޕްރޮގްރާމު މިއަދު ހަވީރު ފައްޓަވައިދެއްވީ އޭދަފުށީގެ ފޫޅުމާއެއް ކަމަށްވާ މިރަށު ގުލްބަކާގޭ ހަސީނާ މުހައްމަދު (ހަސީނައްތަ) އެވެ.
ގަސް އިންދުމުގެ ހަރަކާތުގައި އިސްކޮށް އުޅުއްވި މީހަކު ބުނި ގޮތުގައި މި ޕްރޮގްރާމަކީ ފަހަކަށް އައިސް މުޅި ރާއްޖޭގައި ވެސް ކާށި ލިބުން ވަނީ ވަރަށް ބޮޑަށް މަދުވެ ކާށީގެ އަގު އަރައިގެން ގޮސްފައިވާތީ އޭދަފުށީގެ ދަރިންތަކެއްގެ އިސް ނެގުމުގެ މަތިން ފެށި ޕްރޮގްރާމެކެވެ. މި ޕްރޮގާރާމުގެ ދަށުން މިއަދު ހަވީރު މިރަށު ހުޅަނގު އުތުރު ސަރަހައްދުގައި 200 އެއްހާ ރުއް ވަނީ އިންދާފަ އެވެ. އަދި އެ ރުއްތަކަށް ފެންދޭނެ އިންތިޒާމުވެސް ވަނީ ހަމަޖައްސައިފަ އެވެ.
“އުއްމީދު ކުރަނީ މިއަދު ފެށީ މި ޕްރޮގްރާމު އެންމެންގެ ބައިވެރިވުމާއެކު އަހަރެއްހާ ދުވަހުގެ ތެރޭގައި ރަށުގެ ކޮންމެ މީހަކަށް ރުކެއް އިންދޭނެ ކަމަށް،”
ގިނަ އަދަދެއްގެ ރުއް އިންދުމުގެ ޕްރޮގްރާމެއް މިއަދު ފެށި އިރު މިމަހު ކުރީކޮޅު ވަނީ ފޭލި ޖަމިއްޔާއިން އޭދަފުށީ ފެހިކުރުމުގެ ކެމްޕޭނެއް ފަށައިފަ އެވެ. ސޮނެވާފުއްޓާއި ރަށޫ ކައުންސިލު އަދި ސްކޫލުގެ ތިމާވެށި ކްލަބު ގުޅިގެން ފެށި އެ ޕްރޮގްރާމުގެ ދަށުން ވެސް ރަށުގެ ސްޓޭޖް ސަރަހައްދުގައި ހިޔާދޭ ބޮޑެތި ގަހާއި ރުއް އިންދާފައިވެ އެވެ.