މިޔަންމާގައި ދިރިއުޅޭ ރޮހިންޖާ ދަރިކޮޅުގެ މުސްލިމުންނާ ދެކޮޅަށް ހިންގާ ލާއިންސާނީ އަމަލުތަކާ ދެކޮޅަށް އޭދަފުށީގައި ވެސް ހިނގާލުން ބާއްވައިފި އެވެ.
މިއަދު ހަވީރު ބޭއްވި އެ ހިނގާލުމުގައި ރޮހިންޖާ މީހުންނާ މެދު ހިންގާފައިވާ އަމަލުތައް ދައްކައިދޭ ޕޯސްޓަރުތަކާއި ތަފާތު ޝުއޫރުތައް ލިޔެފައިވާ ބޯޑުތައް ހިފައިގެން ގިނަ އަދަދެއްގެ ބަޔަކު ނުކުތެވެ. އޭގެ އިތުރުން ރޮހިންޖާ މީހުންނަށް އެހީވާން އޭދަފުށީގައި އިއްޔެ ބެހެއްޓި ފަންޑް ފޮށްޓައް ފައިސާ ހޯދުމުގެ ހަރަކާތްތަކެއްވެސް ވަނީ ކުރިއަށް ގެންގޮސްފަ އެވެ.
ރޮހިންޖާ މީހުންނަށް ކުރަމުންދާ އަނިޔާއާ ދެކޮޅަށް ރާއްޖޭގެ އެކި ރަށްތަކުގައި ހަރަކާތްތައް ދަނީ ހިނގަމުންނެވެ. އެގޮތުން އިއްޔެ ވެސް ބައެއް ރަށްރަށުގައި ވަނީ ހިނގާލުން ބާއްވައިފަ އެވެ.
ރޮހިންޖާ މީހުންނާ ދެކޮޅަށް ހިންގާ އަނިޔާވެރި އަމަލުތަކާ ގުޅިގެން ދުނިޔޭގެ އެކި ގައުމުތަކުގެ ލީޑަރުން ދަނީ މިޔަންމާގެ ލީޑަރު އަދި ނޮބަލް ސުލްހައިގެ އިނާމް ހޯއްދަވާފައިވާ އަންގްސަން ސޫކީއާ ވަރަށް ބޮޑަށް ފާޑު ވިދާޅުވަމުންނެވެ.
މިއަންމާގެ އަނިޔާވެރި އަމަލުތަކާ ގުޅިގެން އެތައް ހާސް ބަޔަކު މިހާރު ވެސް ބަންގްލަދޭޝް އަށް އެތެރެވެއްޖެ އެވެ. ނަމަވެސް އެ މީހުންނަށް އެހީވުމުގައި ދުނިޔޭގެ ވެރިންނާއި ޖަމާއަތްތައް ފަސްޖެހިފައި ވާތީ އާންމުންގެ ވަރަށް ބޮޑަށް ފާޑުކިޔުންތަކެއް ވެސް ވަނީ އަމާޒުވެފަ އެވެ.