ހާލުގައި ޖެހިފައިވާ ރޮހިންޖާ މުސްލިމުންނަށް އެހީވުމުގޮތުން ބ. ފުޅަދޫ ރައްޔިތުން ފާނަ އަށް ގޮސް 70 ހާހަށްވުރެ ގިނަ ރުފިޔާ ހޯދައިފި އެވެ.
ރޮހިންޖާ މުސްލިމުންނަށް އެހީވުމަށް ފައިސާ އެއްކުރުމަށް އެރަށު ރައްޔިތުން ހަތަރު ދޯނީގައި މިދިޔަ ހޯމަ ދުވަހު ފާނައަށް ގޮސް އައީ އިއްޔެ އެވެ.
ފާނަ އަށަ ދިޔަ ދޯނިތައް ރަށަށް އައި ވަގުތު އެރަށުގެ އަންހެން ވެރިން ވަނީ ގަދައަށް ސައިވެސް ހަދާފަ އެވެ. އެރަށު އަންހެންވެރިންނަކީ މިކަހަލަ ކޮންމެ ކަމެއްގައިވެސް ވަރަށް ފޯރީގައި ހަރަކާތްތެރިވާ ބައެއް ކަމަށް ފުޅަދޫ ކައުންސިލުން ބުންޏެވެ.
ފުޅަދޫ ކައުންސިލުގެ ރައީސް އަހްމަދު އާސިފް ވިދާޅުވީ ހާލުގައި ޖެހިފައިވާ ރޮހިންޖާ މުސްލިމުންނަށް އެހީވުމުގޮތުން ފައިސާ އެއްކުރުމަަށްޓަކައި އެރަށު ރައްޔިތުން ދެ ދުވަހުގެ ފާނައިގެ މަސްވެރިކަން ކޮށްގެން 73170 ރުފިޔާ ހޯދާފައިވާ ކަމަށެވެ. އޭގެ އިތުރުން އެރަށުގައި ބެހެއްޓި 3 ފަންޑް ފޮށްޓަށް 6890 ރުފިޔާ އާއި ބެލެނިވެރިންގެ ޖަމްބަލް ސޭލުން 5630 ރުފިޔާ ލިބިފައިވާ ކަމަށެވެ.
މި ހުރިހާ ފައިސާ އެއްވެސް ޖަމާކުރާނީ ސަރުކާރުން ރޮހިންޖާ މުސްލިމުންނަށް އެހީވުމަށް ބޭންކް އޮފް މޯލްޑިވްސްގައި ހުޅުވައިފައިވާ އެކައުންޓަށް ކަމަށް އެރަށު ކައުންސިލުން ބުންޏެވެ.
“ރައްޔިތުންގެ ފަރާތުން މިފަދަ ރީތި ނަމޫނާއެއް ދައްކުވައިދިނީތީ ހުރިހާ ރައްޔިތުންނަށް ކައުންސިލުގެ ނަމުގަ އާއި އަޅުގަނޑުގެ އަމިއްލަ ނަމުގައި ވަރަށް ބޮޑަށް ޝުކުރު ދަންނަވަން،” 200 އެއްހާ މީހުން ދިރިއުޅެމުން އަންނަ އެރަށު ކައުންސިލުގެ ރައީސް އާސިފް ވިދާޅުވި އެވެ.
ރާއްޖޭގެ އެކިއެކި ކަންކޮޅުތަކުގައި ރޮހިންޖާ މުސްލިމުންނަށް އެހީވުމަށްޓަކައި ދަނީ ތަފާތު ހަރާކަތްތައް ހިންގަމުންނެވެ.
ފުޅަދޫ ގެ މީސްކޮޅު މަދު ރަޢިއްޔަތުން ދައްކައިދީފައި އެވަނީ، އެ މީހުންނަކީ ލާމަސީލު ހިތްވަރުގަދަ ބައެއްކަން. ތިޔަ ލޮބުވެތި ރައްޔިތު ކުދި ބޮޑު އެންމެހާ އަޚުންނާ އުޙުތުންނަށް އަޅުގަނޑުގެ ހިތުގެ އެންމެ ފުންމިނުން ޝުކުރާއި މަރުޙަބާ އަރިސްކުރަން. ވަރަށް ބޮޑަށް ޝުކުރިއްޔާ!
ސެލިއުޓް!!!!!!!
ބ. ފުޅަދޫ ރައްޔިތު އަށް އަޅުގަނޑުގެ އަމިއްލަ ނަމުގައި ވަރަށް ބޮޑަށް ޝުކުރު ދަންނަވަން،.