ބ. އަތޮޅު ތައުލީމީ މަރުކަޒުގެ ދަރިވަރުން ސްކޫލުގައި ގުރުއާން ހަތިމުކުރުމަށް ހާއްސަ ޕްރޮގްރާމެއް މިއަދު ފަށައިފި އެވެ.
ސްކޫލުގެ މެންދުރުފަހު ދަންފަޅީގެ ޓީޗަރުންނާއި ލީޑިން ޓީޗަރުން އިސްނަގައިގެން ފެށި މި ޕްރޮގްރާމުގައި މެންދުރުފަހު ދަންފަޅީގެ ހުރިހާ ދަރިވަރުން ބައިވެރިވެ އެވެ.
މެންދުރުފަހު ދަންފަޅިގެ 200 އެއްހާ ދަރިވަރުންނާއެކު މިއަދު މި ޕްރޮގްރާމު އެ ސްކޫލުގަިއ ރަސްމީކޮށް ފައްޓަވައިދެއްވީ ސްކޫލުގެ އިސްލާމް މުދައްރިސް އައްޝެއިޚް އަބްދުލްމަޖީދު މުހައްމަދު އެވެ.
“މިއީ މިއަހަރު ކިޔެވުން ފެށުމާއެކު ކުރިއަށް ގެންދިއުމަށް ރާވާފައިވާ ޕްރޮގްރާމެއް. އެހެން ނަމަވެސް ތަފާތު ސަބަބުތަކާ ހެދި މި ޕްރޮގްރާމު ނުފެށި ލަސްވީ، މި ޕްރޮގްރާމުގެދަށުން ކޮންމެ ދުވަހަކުވެސް ސެޝަން ފެށުމާއެކު ފުރަތަމަ ދިހަ މިނިޓް ދަރިވަރުން ގުރުއާން ކިޔަވާނީ، ދަރިވަރުންނާއެކު ޓީޗަރުންވެސް ބައިވެރިވާނެ،” ގްރޭޑް 6، 7 ގެ ލީޑިން ޓީޗަރު މައުސޫމާ ޚަލީލުު ވިދާޅުވި އެވެ.
މިއަދު ރަސްމީކޮށް މި ޕްރޮގްރާމު މި ފެށީ ކޮންމެ ކުއްޖަށް ހާއްސަކޮށް ހަތިމެއް ވެސް ހަދިޔާ ކުރުމާއެކު އެވެ.
މި ޕްރޮގްރާމުގެ މައިގަނޑު މަގުސަދަކީ ގުރުއާން މުދައްރިސް ޝާފިއާ އަހްމަދު ވިދާޅުވި ގޮތުގައި ދަރިވަރުންގެ ހިތުގައި ކީރިތި ގުރުއާނަށް ލޯބި ޖެއްސުމާއި ކީރިތި ގުރުއާނުގެ ދެލިގަނޑު ފަރިތަކޮށް ކިޔަވަން ދަސްކޮށްދިނުމުގެ އިތުރުން ކަންކަމުގައި ދަރިވަރުންނަށް އިހުލާސްތެރިވާން ދަސްކޮށްދިނުމުވެ.
ތައުލީމީ މަރުކަޒުގައި ގުރުއާން ހަތިމުކުރުމަށް ހާއްސަ ޕްރޮގްރާމެއް މިއަދު ފެށިއިރު، ކީރިތި ގުރުއާނާބެހޭ މަރުކަޒާއި އޭދަފުށީ ކައުންސިލް ގުޅިގެން މިދިޔަ މަހު މިރަށުގައި ވަނީ ގުރުއާން ހިތުދަސްކޮށްދިނުމަށް ޕްރޮގްރާމެއް ވެސް ފަށައިފަ އެވެ.
