ބޮޑު ޗުއްޓީއާ ދިމާކޮށް ހިތާނުކުރަން ބޭނުންވާ މީހުންނަށް ހާއްސަކޮށްގެން “ހިތާނީ ކޭމްޕް” އެއް ބ. އަތޮޅުހޮސްޕިޓަލުގައި މިއަހަރުވެސް ބާއްވާ ގޮތަށް ހަމަޖައްސައިފި އެވެ.
ބ. އަތޮޅު ހޮސްޕިޓަލުން ބުނި ގޮތުގައި އަންނަ ނޮވެމްބަރުމަހުގެ ފަހު ހަފްތާއިން ފެށިގެން ޑިސެމްބަރު ފުރަތަމަ ހަފްތާ ތެރޭ އެ ހޮސްޕިޓަލުގައި ބާއްވާ ކޭމްޕްގައި ބައިވެރިވާން ބޭނުންވާ ފަރާތްތަކަށް ނަންނޯޓް ކުރުމަށް މިހާރު ވަނީ ފުރުސަތު ހުޅުވާލައިފަ އެވެ.
މި ކޭމްޕްގައި ބައިވެރިވުމަށް އެއްވެސް ފީ އެއް ދައްކާކަން ނުޖެހެ އެވެ. ހިތާނު ކުރުމަށް ހިނގާ ހުރިހާ ހަރަދެއް އާސަންދައިން ކަވަރު ކުރެ އެވެ.
އަތޮޅު ހޮސްޕިޓަލުން ބުނި ގޮތުގައި މި ކޭމްޕްގައި ހިތާނު ކުރުމަށްޓަކައި ހަދަންޖެހޭ ޓެސްޓްތައް ހެދުމާއި ހިތާނުކުރުން ކުރިއަށް ދާނީ އެ ހޮސްޕިޓަލުގައި މަސައްކަތް ކުރައްވާ އޮޕްރޭޝަން ޑޮކްޓަރެއްގެ ބެލުމުގެ ދަށުންނެވެ.
ޗުއްޓީއާ ދިމާކޮށް، ހިތާނުކުރަން ބޭނުންވާ ފަރާތްތަކަށް ލުއި ފަސޭހަ ގޮތެއް ހޯދައިދިނުމަށް ފަހަކަށް އައިސް ކޮންމެ އަހަރަކުވެސް އަތޮޅު ހޮސްޕިޓަލުގައި ހިތާނު ކުރުމުގެ ކޭމްޕެއް ބާއްވަ އެވެ. އެގޮތުން ހިތާނީ ކޭމްޕަށް އަތޮޅު ހޮސްޕިޓަލު ވަރަށް ބޮޑަށް ޒީނަތްތެރިކުރެ އެވެ. އަދި ހިތާނުކުރާ ކުދިން އެ ތަނުގައި ބައިތިއްބާ ވަގުތުތަކުގައި ކުދިންނަށް ހަދިޔާ ދިނުމުގެ ފުރުސަތުވެސް އޮންނަނީ ހުޅުވާލައިފަ އެވެ.
