އޭދަފުށީ ދެނުކު ފަރާތު ހިއްކި ބިމުގައި ތަރައްގީކުރި ކުޑަކުދިންގެ ޕާކު މިއަދު އާއްމުންނަށް ހުޅުވާލައިފި އެވެ.
ގިނަ އަދަދެއްގެ ކުޑަކުދިންނާއެކު މިއަދު ހަވީރު ޕާކު ހުޅުވައިދެއްވީ މޯލްޑިވްސް އެއާޕޯޓްސް ކޮމްޕެނީގެ މެނޭޖިން ޑިރެކްޓަރު އޭދަފުއްޓަށް އުފަން އާދިލް މޫސާ އެވެ.
ޕާކު މިއަދު އާއްމުންނަށް ހުޅުވާލި ނަމަވެސް އަންނަމަހު ތެރޭ ކުލަ ގަދަ ރަސްމިއްޔާތަކާއެކު ރަސްމީކޮށް ޕާކު ހުޅުވުން އޮންނާނެ ކަމަށް އާދިލު ވިދާޅުވި އެވެ.
“ސްކޫލު ބަންދާ ދިމާވީމަ ގިނަ ބައެއްގެ އެދުމުގެ މަތިން ނިންމީ މިތަން އެ ކުދިންނަށް ވަގުތީ ގޮތުން ނަމަވެސް ހުޅުވާލަން. މިތަނުގައި އަދިވެސް ބައެއް ކަހަލަ އިތުރު އައިޓަމުތައް ބެހެއްޓިގެންދާނެ. އަންނަމަހު ރަސްމީކޮށް ހުޅޭވޭ ދުވަހު ކުޑަކުދިން މަޖާވާނެ ތަފާތު ހަރަކާތްތައް އޮންނާނެ،”
އާދިލު ވިދާޅުވި ގޮތުގައި މިއީ ވަރަށް ގިނަ ބައެއްގެ ވަރަށްބުރަ މަސައްކަތް ކަމަށާއި އަދި މިއީ ރަށުގައި އުޅޭ ހުރިހާ ކުޑަކުދިންނަށް ލިބިގެންދާނެ ފައިދާއެކެވެ. އަދި މިތަން އެންމެ ރަނގަޅު ގޮތުގައި ބެލެހެއްޓުމަށް ރައްޔިތުންގެ ކިބައިން އާދިލް އެދިވަޑައިގެންނެވި އެވެ.
މި ޕާކު ތަރައްގީކޮށްފައިވަނީ މާލޭގައި ހުންނަ ޕާކްތައްވެސް ހުންނަ ފެންވަރަށް އެންމެ ޒަމާނީ ފެންވަރަށެވެ. އެތަނުގައި ކުޑަކުދިން ކުޅޭނެ ސާމާނާއި އެކުދިންގެ ބެލެނިވެރިންނަށް އިށީންދެލައިގެން ތިބެވޭނެ ގޮތް ހަދާފައިވެ އެވެ. ޕާކުގައި ސީސޯވް މެރީގޯރައުންޑް، އުނދޯލި ލެޑާ ސްލައިޑް ޕްލޭގްރައުންޑް ކްލައިމްބާސް ފަދަ ތަފާތު ތަކެތި ބަހައްޓާފައި ވެ އެވެ.
އޭގެ އިތުރުން ބޮޑެތި މީހުންނަށް ހާއްސަ އައުޓް ޑޯ ޖިމެއްވެސް ޕާކު ތެރޭގައި ހުރެ އެވެ.
