ސިއްހީ ދާއިރާއަށް ބޭނުންތަކެތި ފުޅާދާއިރާއެއްގައި ފޯރުކޮށްދެމުން އަންނަ މެޑްޓެކް މޯލްޑިވްސް ޕްރައިވެޓް ލިމިޓެޑުން އޭދަފުށީ މަސްޖިދު ސުލްތާން މުހައްމަދު މުއީނުއްދީން (ބޮޑު މިސްކިތް) އަށް ކާޕެޓް ހަދިޔާ ކޮށްފި އެވެ.
އޭދަފުށީ ކައުންސިލުގެ ރައީސް ތޮލާލު އަބްދުއްރަހްމާން ވިދާޅުވީ، ބޮޑު މިސްކިތަށް މެޑްޓެކުން ހަދިޔާކުރި ކާޕެޓް މިއަދު މިރަށް ލިބިފައިވާ ކަމަށެވެ.
“އާ ކާޕެޓްތައް މިހާރު ލިބިފައި ހުރީ. އަންނަ ހަފްތާތެރޭ ކާޕެޓް އެޅުމުގެ މަސައްކަތވެސް ފެށިގެންދާނެ ކަމަށް މިބަލަނީ،” ތޮލާލު ވިދާޅުވި އެވެ.
ތޮލާލު ވިދާޅުވީ މެޑްޓެކުން ހަދިޔާކުރި ކާޕެޓް އަޅައިދޭނީ ވެސް އެ ކުންފުނިން ކަމަށެވެ.
ތޮލާލް ވިދާޅުވީ ކާޕެޓްގެ އިތުރުން ބޮޑު މިސްކިތުގެ ގުއްބުގެ އެތެރޭގައި ހަރުކުރުމަށް ސީލިންގް ބޮޑު ފަންކާއެއް ހޯދުމާބެހޭގޮތުންވެސް ވިޔަފާރިވެރިންނާއެކު މަޝްވަރާ ކުރެވެމުންދާކަމަށާ، މަޝްވަރާތަކަށް ބޮޑެތި ކުރިއެރުން ލިބެމުން އަންނަކަމަށެވެ.
އޭދަފުށީ ރައްޔިތުން ހިލޭސާބަހަށް ކުރި މަސައްކަތުން، ސަރުކާރުގެ އެހީއާއެކު 1995 ވަނައަހަރު ބިނާކުރި މަސްޖިދު ސުލްތާން މުހައްމަދު މުއީނުއްދީންގައި އެންމެ ފުރަތަމަ ކާޕެޓްއެޅީ މިސްކިތް ހުޅުވުމުގެ ރަސްމިއްޔާތަށެވެ. އޭގެފަހުން ކާޕެޓް އާކުރީ 2007 ވަނަ އަހަރުތެރޭގަ އެވެ. އެ ދެ ފަހަރު މިސްކިތުގެ ކާޕެޓް އެޅުމުގައި އޭދަފުށީގެ މަހުޖަނު ޗާންދަނީގޭ އަހްމަދު ނަޒީރުގެ ބޮޑު އެހީތެރިކަމެއްވެދީފައިވެ އެވެ.
މެޑްޓެކް މޯލްޑިވްސްއިން އަންނަނީ އޭދަފުއްޓަށް ހާއްސަކޮށް އެކި ދާއިރާތަކުން އެހީތެރިކަން ފޯރުކޮށްދެމުންނެވެ. އެގޮތުން އެ ކުންފުނިން 2015 ގައި 3 މިލިއަން ރުފިޔާގެ ޑޖިޓަލް އެކްސްރޭ މެޝިނެއް ބ.އަތޮޅު ހޮސްޕިޓަލަށް ދިނެވެ. އަދި އެ ކުންފުނިން އަންނަތީ ބ. އަތޮޅު ތައުލީމީ މަރުކަޒު ޑިޖިޓަލް ކުރުމުގެ ޕްރޮޖެކްޓަށްވެސް އެހީ ވަމުންނެވެ.