ބ. ދަރަވަންދޫ ކައުންސިލުން އެރަށު ސްކޫލު ދަރިވަރުންނަށާއި އޮފީސްތަކަށައި އަދި ގެސްޓް ހައުސްތަކަށް ތިމާވެއްޓާ ރައްޓެހި “ފޯ ދި އޯޝަން” ރީޔޫޒަބަލް ކޮތަޅު ހަދިޔާކޮށްފި އެވެ.
“ފޯ ދަ އޯޝަން” އަކީ އެއް ފަހަރު ބޭނުން ކޮށްފައި އުކާލާ ޕްލާސްޓިކް ކޮތަޅު ބޭނުން ކުރުން ހުއްޓާލުމަށް ބާރު އަޅައި، ރިޔޫޒަބަލް ކޮތަޅު ބޭނުން ކުރުން އާދައަކަށް ހެދުމަށް ދިރާގުން މިދިޔަ އަހަރުފެށި ކެމްޕޭނެކެވެ.
ދަރަވަންދޫ ކައުންސިލާ ދިރާގުގެ އެހީތެރި ކަމާއެކު ހިންގި މި ޕްރޮގްރާމުގައި ދެހާހެއްހާ ކޮޅު އެރަށު ސްކޫލު ދަރިވަރުންނާއި ގެސްޓު ހައުސްތަކަށް ވަނީ ހަދިޔާ ކޮށްފައެވެ.
ދަރަވަންދޫ ކައުންސިލުން ބުނި ގޮތުގައި މި ޕްރޮގްރާމުގެ މަގުސަދަކީ ކުނީގެ ގޮތުގައި އުކާލެވޭ ޕްލާސްޓިކް ކޮތަޅު ވީހާ ވެސް މަދުކުރުމެވެ. އަދި ދަރަވަންދޫއަކީ ކުނިބުނިން ސަލާމަތް ވެފައިވާ ރީތި ރަށަކަށް ހެދުމާއި ތިމާވެއްޓާ ރައްޓެހި ރައްޔިތެއް ބިނާކުރުމަކީވެސް މި ޕްރޮގްރާމުގެ މަގުސަދެއްކަމަށް އެރަށު ކައުންސިލުން ބުނެ އެވެ.
“ފޯ ދަ އޯޝަން” އަކީ ތިމާވެށި ހިމާޔަތް ކުރުމުގެ މަސައްކަތް ކުރާ ބައިނަލްއަގްވާމީ ޖަމިއްޔާ “ޕާލޭ” އާއި އެ ޖަމިއްޔާ އިން ހަމަޖައްސާފައިވާ ރާއްޖޭގެ އެސޯސިއޭޓް، ބީމްއާ ގުޅިގެން ދިރާގުން ކުރިއަށް ގެންދާ ކެމްޕޭނެކެވެ.
