ދޮންފަނު އިންވިޓޭޝަން ކަޕް ފުޓްބޯޅަ މުބާރާތުގެ ދެވަނަ މެޗުގައި މިއަދު ގޮއިދުއާއި ދަރަވަންދޫ ބައްދަލުކުރި މެޗު 1-1 އިން އެއްވަރުވެގެން ނިމެއްޖެއެވެ.
މިއަދުގެ މެޗުގައި ފުރަތަމަ ލީޑު ނެގީ ދަރަވަންދޫންނެވެ. މި ލަނޑު މެޗުގެ 69 ވަނަ މިނިޓުގައި ކާމިޔާބުކޮށްދިނީ މެޗުގެ މޮޅު ކުޅުންތެރިޔާގެ މަގާމް ހޯދި ސާމިހު ޢަލީ ޝަރީފް އެވެ. ގޮއިދޫން އެއްވަރުކުރީ މެޗު ނިމެން ދެމިނިޓަށް ވެފައި ވަނިކޮށް ލިބުނު ޕެނަލްޓީއަކުން ޙުސައިން ޝާމް އެވެ.
މިއަދުގެ މެޗަށް ގޮއިދޫ ޓީމު ދޮންފަނަށް ގޮސްފައިވަނީ ދިގު ދަތުރަކަށް ފަހުއެވެ. ދަރަވަންދޫން ލީޑު ނެގުމާއެކު ގޮއިދޫ ޓީމުން ވަނީ ލަނޑެއް ޖަހަން ވަރަށް މަސައްކަތް ކޮށްފައެވެ. ފުޓްބޯޅައިގައި ގޮއިދޫއަކީ އަތޮޅު ފެންވަރުގައި ފާހަގަކޮށްލެވޭ ރަށެކެވެ. އެރަށުން މުބާރާތުގައި ވާދަކުރާ މިއީ ފުރަތަމަ ފަހަރެވެ. މި މުބާރާތުގެ ފުރަތަމަ މެޗުގައި ކިހާދޫ އާއި ދޮންފަނު ބައްދަލުކުރި މެޗުވެސް ނިމުނީ 1-1 އިން އެއްވަރު ވެގެންނެވެ.
މުބާރާތުގައި މާދަމާ ކުޅޭ މެޗުގައި ބައްދަލުކުރާނީ އޭދަފުއްޓާއި މިދިޔަ އަހަރުގެ ޗެމްޕިއަން ކިހާދޫ އެވެ.
