އޭޝިޔާ ޕެސިފިކް ރީޖަންގެ ސްކޫލްތައް ސުނާމީ ކާރިސާއަށް ހޭލުންތެރިކުރުވަން ކުރިއަށްގެންދާ ޕްރޮޖެކްޓްގެ ދަށުން ބ. ތައުލީމީ މަރުކަޒުގައި ސުނާމީ އިވެކުއޭޝަން ޑްރިލްއެއް ބާއްވަން ތައްޔާރުވާން ފަށައިފި އެވެ.
“އޭޝިއާ ފެސިފިކް ރީޖަނަލް ސްކޫލް ސުނާމީ ޑްރިލް ޕްރޮޖެކްޓް” ނަމުގައި މި ޕްރޮޖެކްޓުގެ މައުލޫމާތު ދިނުމުގެ ސެޝަންތައް މިހާރުވަނީ ފަށައިފަ އެވެ. ޓްރެއިނިން ސެޝަންތައް ކުރިއަށް ގެންދަނީ، ޔޫއެންޑީޕީއާ، މޯލްޑިވިއަން ރެޑްކްރެސެންޓާއި، މޯލްޑިވްސް ނެޝަނަލް ޑިފެންސް ފޯސްގެ ފަޔާ އެންޑް ރެސްކިއު ސާވިސްއާއި، މޯލްޑިވްސް ޕޮލިސް ސާވިސް އަދި ނެޝަނަލް ޑިޒާސްޓަރ މެނޭޖްމަންޓް ސެންޓަރު ގުޅިގެނެވެ.
މި ސެޝަންތަކުގައި ސުނާމީ އިވެކުއޭޝަން ޑްރިލް އަށް ތައްޔާރުވުމުގެ ގޮތުން ސުނާމީ އަށް އަހުލުވެރިކުރުމުގެ ސެޝަންތަކާއި، ރަށުގެ ރިސްކް ޕްރޮފައިލް، މުވައްސަސާތަކުގެ އަދި ސްކޫލް މުވައްޒަފުންގެ ދައުރާއި ޒިންމާ، ސެކިއުރިޓީ ބެލެހެއްޓުން، ހިނގާފާނެ އަލިފާނުގެ ހާދިސާ ތަކަށް އަހުލުވެރިކުރުވުމުގެ ސެޝަން، ފުރަތަމައެހީ އަދި ސައިކޮސޯޝަލް އެހީ ދޭނެގޮތްތަކަށްއަހުލުވެރި ކުރުވައި، “ސްކޫލް އިމަރޖެންސީ އޮޕަރޭޝަންސް ޕްލޭން” (އެސް.އީ.އޯޕީ) އަށް އަހުލުވެރިކުރުވައި އަދި ޓްރޭނިން ސެޝަންތަކެއްވެސް ކުރިއަށް ގެންދާނެ އެވެ.
މި ޓްރޭނިންތަކަށްފަހު ސުނާމީ އިވެކުއޭޝަން ޑްރިލް އޮންނާނީ އަންނަ ބުދަ ދުވަހު އެވެ.
މި ޕްރޮޖެކްޓަކީ ޖަޕާނު ސަރުކާރުން ފަންޑުކޮށްގެން ޔުނައިޓެޑް ނޭޝަންސް ޑިވެލޮޕްމަންޓު ޕްރޮގްރާމް (ޔޫ.އެން.ޑީ.ޕީ) އާއި ގުޅިގެން ދުނިޔޭގެ 18 ގައުމެއްގެ 90 ސްކޫލެއްގައި ކުރިއަށް ގެންދިއުމަށް ރާވާފައިވާ ތަމްރީނު ޕްރޮގްރާމްތަކެކެވެ. މި ޕްރޮގްރާމް ރާއްޖޭގެ އެކި ސަރަހައްދުތަކަށް ބަހާލައިގެން ފަސް ސްކޫލެއްގައި ކުރިއަށް ގެންދިއުމަށް ވަނީ ރާވާފައެވެ. ބ. އަތޮޅު ތައުލީމީ މަރުކަޒަކީ މި ޕްރޮޖެކްޓް ހިންގާ 5 ވަނަ ސްކޫލެވެ.
Thanks for hosting! Hope you had a nice weekend.