މިދިޔަ ކުޑަ އީދު ބަންދުގައި 370 އަށް ވުރެ ގިނަ ދިވެހިން ރޯޔަލް އައިލެންޑް ރިސޯޓުގައި އާއިލާއާއެކު ޗުއްޓީ ހޭދަކޮށްފި އެވެ.
ވިލާ ހޮޓެލްސް އިން ބ. އަތޮޅުގައި ހިންގާ އެ ރިސޯޓުގެ އޮފިޝަލަކު ވިދާޅުވި ގޮތުގައި މިދިޔަ ކުޑަ އީދު ބަންދު ތެރޭގައި އެ ރިސޯޓުގައި 370 ވަރަކަށް ދިވެހިން ޗުއްޓީ ހޭދަކުރި އެވެ. އަދި މި މަހުގެ 15-17 އަށް ކޮންމެ ދުވަހަކު ވެސް އެވްރެޖްކޮށް ސަތޭކައެއްހާ ދިވެހިން އެ ރިސޯޓުގައި ޗުއްޓީ ހޭދަކޮށްފައިވާ ކަމަށް ވެސް އޭނާ ވިދާޅުވި އެވެ.
“ރޯޔަލް އައިލެންޑް މިހާރު މިވަނީ ވަރަށް ބޮޑަށް ދިވެހިންނަށް ކަމުގޮސްފައި. އޭގެ ހެއްކެއް މިހާރު އެންމެ ގިނަ ދިވެހިން އާއިލާއާއެކު ޗުއްޓީ ހޭދަކުރަން އަންނަ އެއް ރިސޯޓަކީ މިއީ،”
ރޯޔަލް އައިލެންޑުން އީދު ބަންދާ ދިމާކޮށް ވިއްކި އެ ޕެކޭޖްގައި ހިމަނާފައި ވަނީ އެ ރިސޯޓުގެ ބީޗް ވިލާ ނުވަތަ ގާޑަން ވިލާގައި ހުރުމާއި ތިން އިރުގެ ކެއުމެވެ. އެ ޕެކޭޖުގައި ނެގީ ދެ މީހަކަށާއި ކުޑަ އެއް ކުއްޖަކަށް ރެއަކަށް 1999ރ. އެވެ. އޭގެ އިތުރުން ދަތުރުގެ ހަރަދުގެ ގޮތުގައި ބޮޑު މީހަކަށް 800ރ. އަދި ކުޑަކުއްޖަކަށް 500ރ. ވަކިން ޗާޖުކުރި އެވެ. އޭދަފުށިން ރިސޯޓަށް ދާން ބޭނުންވާ ފަރާތްތަކަށް ރިސޯޓުން ހިލޭ ދަތުރު ހަމަޖައްސައިދިނެވެ.
މި ޕެކޭޖްގެ ދަށުން މިމަހުގެ ނިޔަލަށް އެ ރިސޯޓްގައި ޗުއްޓީ ހޭދަކުރެވޭނެ އެވެ.