ބ. މާޅޮހުގެ ނަރުދަމާގެ މަޝްރޫއު އަވަހަށް ފައްޓަވައިދެއްވުމަށް އެރަށު ކައުންސިލުން ރައީސް އިބްރާހިމް މުހައްމަދު ސޯލިހުގެ އަރިހުން އެދިވަޑައިގެންފިއެވެ.
ކައުންސިލުން އެކަމަށް އެދިވަޑައިގެންފައި ވަނީ އިއްޔެ ރައީސް ސޯލިހު އާއެކު ބޭއްވި ބައްދަލުވުމުގައެވެ.
ރައީސް އޮފީހުގައި ބޭއްވި އެ ބައްދަލުވުމުގައި އެ ރަށުގެ ތަރައްޤީއަށް ރާވާފައިވާ މަސައްކަތްތަކާއި މިހާރު ކުރިއަށްދާ ތަރައްޤީގެ މަސައްކަތްތަކާބެހޭ މައުލޫމާތު ރައީސް ސޯލިހު އާއި ވަނީ ހިއްސާކޮށްފަ އެވެ.
އެގޮތުން އެ ރަށަށް މިހާރު އެންމެ ބޮޑަށް ބޭނުންވެފައިވަނީ ނަރުދަމާގެ ނިޒާމް ކަމަށާއި، ނަރުދަމާގެ މަޝްރޫޢު އަވަހަށް ފައްޓަވައިދެއްވުމަށް ވެސް ކައުންސިލުން ރައީސް ސޯލިހު އަރިހު އެދިވަޑައިގެންފައިވާ ކަމަށް ރައީސް އޮފީހުން މައުލޫމާތުދެއެވެ.
މީގެ އިތުރުން ފަތުރުވެރިކަމަށް ދޫކުރާ ބިންތަކުން ރަށުގެ ކައުންސިލަށް އާމްދަނީ ލިބޭނެ މަގު ފަހިކޮށްދެއްވުމަށް ވެސް ކައުންސިލުން ވަނީ އެދިވަޑައިގެންނެވިއެވެ. އަދި އެ ރަށުގެ ބަނދަރު ތަރައްޤީ ކުރުމުގެ އިތުރުން ސުކޫލަށާއި ޞިއްޙީ މަރުކަޒަށް ދަތިވާ ބައެއް ކަންތައްތައް ކައުންސިލުން ވަނީ ހިއްސާކުރައްވާފައެވެ.
މި ބައްދަލުވުމުގައި ރައީސް ސޯލިހު ވިދާޅުވީ ކައުންސިލުން އެދިވަޑައިގެންނެވި ކަންކަމުގައި ކަމާގުޅޭ މިނިސްޓްރީތަކާއި އެކު މަޝްވަރާކުރެއްވުމަށް ފަހު އެކަންކަމަށް ހައްލެއް ހޯއްދަވައިދެއްވަން މަސައްކަތް ކޮށްދެއްވާނެ ކަމަށެވެ.
