ބ. ތުޅާދޫ ކޯޓުގެ އިސްމެޖިސްޓްރޭޓް ކަމުގެ މަގާމަށް ބޭފުޅަކު ޢައްޔަންކޮށް މަގާމުގެ ފަތްކޮޅު ހަވާލުކުރައްވައިފި އެވެ.
މި މަގާމަށް ޢައްޔަން ކުރައްވާފައިވަނީ މއ. ވެލަބުލިގޭ އިބްރާހީމް މައުމޫރު އެވެ.
ޖުޑީޝަލް ސާރވިސް ކޮމިޝަނުގައި ބޭއްވި ރަސްމިއްޔާތެއްގައި، ފަނޑިޔާރު ކަމުގެ ހުވާ ލައިދެއްވީ ސްޕްރީމް ކޯޓުގެ ފަނޑިޔާރު އަލްއުސްތާޛު ޢަބްދުﷲ ޢަރީފެވެ.
ހުވާ ކުރެއްވުމާ އެކު ރައީސުލްޖުމްހޫރިއްޔާ ޖުޑީޝަލް ސާވިސް ކޮމިޝަނަށް އައްޔަންކުރައްވާފައިވާ މެމްބަރު ލަތީފާ ގާސިމް ވަނީ ފަނޑިޔާރު ކަމުގެ ފަތްކޮޅު އަރުވާފައެވެ.
އިއްޔެގެ އެ ރަސްމިއްޔާތުގައި ތުޅާދޫ ކޯޓުގެ އިތުރުން އިތުރު ދިހަ ކޯޓަަކަށްވީ އިސް ފަނޑިޔާރުން އައްޔަން ކުރައްވާފަ އެވެ.
އެ ރަސްމިއްޔާތުގައި ޖޭއެސްސީގެ ރައީސް އާދަމް މުހައްމަދު ދެއްކެވި ވާހަކަފުޅުގައި ކޯޓުތައް މެދުވެރިކޮށް ރައްޔިތުންނަށް ފޯރުކޮށްދޭން ޖެހޭ އަދުލުއިންސާފުގެ ޚިދުމަތް ފުރިހަމަ ގޮތުގައި ފޯރުކޮށް ދިނުމަށް އެ ހުރިހާ ފަނޑިޔާރުންގެ ކިބައިން ވެސް އެދިވަޑައިގެންނެވި އެވެ.
