އެސް.އެމް.އެސް މެދުވެރިކޮށް އާއްމު ދަތުރުފަތުރު އަންގައިދޭ ނިޒާމެއް ޓްރާސްޕޯޓް މިނިސްޓްރީން ތައާރަފްކޮށްފިއެވެ. ރޭ ބ.އަތޮޅު ތައުލީމީ މަރުކަޒުގައި ބޭއްވި ހަފްލާއެއްގައި ރާއްޖޭ ހުރިހާ ރައްޔިތުން ޝާމިލްވާގޮތަށް މި ހިދުމަތް ތަޢާރަފް ކޮށްދެއްވީ ޓްރާންސްޕޯޓް މިނިސްޓަރ އަމީން އިބްރާހިމްއެވެ.
މިހިދުމަތާއި ތަޢާރަފް ކުރެވުމުން އެސް.އެމް.އެސްގެ ޒަރިއްޔާއިން އެދުވަހުގެ ދަތުރުތަކުގެ ޝެޑިއުލް ފޯނަށް ލިބޭނެއެވެ. މީގެ އިތުރުން ހަފްތާގެ ދުވަސްތަކުގެ ދަތުރު ޝެޑިއުލް މި ނިޒާމް މެދުވެރިކޮށް ބެލޭނެ އިންތިޒާމް އެ މިނިސްޓްރީން ވަނީ ހަމަޖައްސާފައެވެ.
ޓްރާންސްޕޯޓް މިނިސްޓަރ އަމީން އިބްރާހިމް ވިދާޅުވީ މި ހިދުމަތް ތަޢާރަފް ކުރެވުމުން ފަސޭހަކަމާއި އެކު ގޭގައި ތިއްބަވައިގެން ދަތުރުފަތުރުގެ ޝެޑިއުލް ރާއްޖޭގެ ރައްޔިތުންނަށް ލިބިގެންދާނެކަމަށެވެ.
މީގެ އިތުރުން މިނިސްޓަރ ވިދާޅުވީ ބައެއް ދުވަސްދުވަހު ކަންދިމާކުރާގޮތުން ދަތުރުފަތުރުގެ ހިދުމަތް ހުއްޓޭކަމަށާއި، މޫސުން ގޯސްވުމުގެ ސަބަބުން ދަތުރު ނުކުރާ ދުވަސްދުވަހުވެސް ކޮންމެހެން ދަތުރުކުރަންޖެހޭ ބޭފުޅުންނަށް ގޭގައި މަޑުކުރެވެން ނޯންނަކަމަށެވެ. ނަމަވެސް ފެރީގެ އިންތިޒާރުގައި ބަނދަރުގައި މަޑުކުރަން ނުޖެހި މި ޤާއިމް ކުރެވުނު ހިދުމަތުން ފަސޭހަ ކަމާއިއެކު މި މަޢުލޫމާތު ރައްޔިތުންނަށް ލިބިގެންދާނެކަމަށެވެ.
ދަތުރުފަތުރުގެ މަޢުލޫމާތު ހޯދުމަށް އެސް.އެމް.އެސް ކުރަން ޖެހޭނީ 3434 ށެވެ.
FS(space)Atoll(space)Departure Island(space)Destination Island
FS(space)Atoll(space)Destination Island