މިދިޔަ އަހަރު މެއި/ޖޫން ގައި ބޭއްވި އެޑެކްސެލް އޭ ލެވެލް އިމްތިހާނުގައި މުޅި ރާއްޖެއިން އެއް ވަނަ އަށް ހޮވުނު 11 ދަރިވަރުންގެ ތެރޭގައި ބ. އަތޮޅު ތައުލީމީ މަރުކަޒުގައި ތައުލީމީ ހާސިލުކުރި އަލީ އަރުޝަމް ހިމެނިއްޖެ އެވެ.
އޭލެވެލް އިމްތިހާނުގައި ފިޒިކްސް މާއްދާއިން ރާއްޖޭއިން އެންމެ ރަނގަޅު ނަތީޖާ ހޯދި ދަރިވަރުންގެ ތެރޭގައިވެސް އަރުޝަމުވަނީ ހިމެނިފަ އެވެ.
އަރުޝަމްގެ އިތުރުން ބ. އަތޮޅު ތައުލީމީ މަރުކަޒުގައި މިދިޔަ އަހަރު ތައުލީމު ހާސިލުކުރި ބ. މާޅޮހު، އެއިޓް، މުނާ އަބްދުއްރަޝީދުވެސް ވަނީ އޭލެވެލް ގަދަ ދިހައެއްގެ ދެ ވަނައިގައި ހިމެނިފަ އެވެ. އަދި މީގެ އިތުރުން އޭދަފުށީ ދެ ކައްޖަކު އޭލެވެލް އެންމެ ރަނަގަޅު 10 ނަތީޖާ ހޯދި ދަރިވަރުންގެ ތެރޭގައި ވަނީ ހިމެނިފަ އެވެ. އެއީ ވިލާ ހައި ސްކޫލުގައި ތައުލީމު ހާސިލުކުރި މިރަށު ތާރީފް އައިޝަތު ޝިފާނާ އާއި، ސީއެޗްއެސްސީ އިން ތައުލީމް ހާސިލުކުރި ޝީޓްމާގޭ ހަސަން ޖުނާހު ޖަމީލު އެވެ.
މީގެ އިތުރުން އެކައުންޓުން ފުލް މާކްސް ހޯދައިގެން ދުނިޔޭގެ އެއް ވަނައިގައި ބ. މާޅޮސް، ޅޮސްމާވިލާ، ހަނާން ނައީމުވެސް ވަނީ ހިމެނިފަ އެވެ.
މިދިޔަ އަހަރުގެ މަތީ ސާނަވީ އިމްތިހާނުން 18 ސްކޫލަކުން 126 ދަރިވަރުން އޭލެވެލްގެ ގަދަ 10 ވަނާގައި ހިމެނިފައިވެ އެވެ. އެއީ 72 އަންހެން ދަރިވަރުންނާއި 54 ފިރިހެން ދަރިވަރުންނެވެ.
މިދިޔަ އަހަރު އޭލެވެލް އިމްތިހާނުގެ ނަތީޖާ އިއުލާނުކޮށް މަތީ ވަނަތައް ހޯދި ދަރިވަރުންނަށް އިނާމު ދިނުމަށް ބޭއްވި އެރަސްމިއްޔާތުގައި މަތީ ތައުލީމަށް ކިޔެވުމުގެ 1،000 ފުރުސަތު ރައީސް އަބްދުﷲ ޔާމީން އެރޭ ވަނީ އިއުލާނު ކުރައްވައިފަ އެވެ.
