ކިހާދޫ ސްކޫލުގެ ޕީ.ޓީ.އޭ ފަންޑަށް ފައިސާ ހޯދުމަށް 2010 ވަނަ އަހަރުން ފެށިގެން މެދުނުކެނޑި ކޮންމެ އަހަރަކުވެސް ބާއްވަމުން އަންނަ ޑިނަ ނައިޓް ”ދިވެހި ސުފުރާ 2014 ” މިއަހަރުވެސް ބޭއްވުމަށް އެ ސްކޫލުގެ ޕީ.ޓީ.އޭ އިން ނިންމައިފި އެވެ.
ބ. އަތޮޅުގެ ރިސޯޓުތަކުގެ މުވައްޒަފުންނަށް އަމާޒުކޮށްގެން، ދިވެހި ރަހަތާކާއެކު ބާއްވަމުން އަންނަ މި ބޮޑު ޖާފަތަކީ، ރިސޯޓުތަކުގައި މަސައްކަތްކުރާ މުވައްޒަފުންގެ މެދުގައި ވަރަށްބޮޑު މަޤުބޫލުކަމެއް ލިބިފައިވާ ހަރަކާތެއް ކަމަށް ކިހާދޫ ސްކޫލުން ބުންޏެވެ.
“ރިސޯޓުތަކުގައި މަސައްކަތްކުރާ މުވައްޒަފުންގެ އިތުރުން ކިހާދޫގެ އާންމު ރައްޔިތުންނާއި ސްކޫލުކުދިން އަދި އަތޮޅުތެރޭގެ ރަށްރަށުގެ ގިނަ އަދަދެއްގެ ރައްޔިތުން ކޮންމެ އަހަރަކުވެސް މި ޑިނަ ނައިޓަށް ޒިޔާރަތް ކުރޭ” އެ ސްކޫލުން ބުންޏެވެ.
ކިހާދޫ ރައްޔިތުން ގުޅިގެން، އަތޮޅު ތެރޭގެ ބައެއް ރިސޯޓުތަކުގެ އެހީއާއި އެކު، އެތައްދުވަހެއްގެ ބުރަމަސައްކަތުން ބާއްވަމުން އަންނަ މި ހަރަކާތުގެ ސަބަބުން ކޮންމެ އަހަރަކުވެސް ބޮޑު އާމްދަނީއެއް އެ ސްކޫލުގެ ޕީ.ޓީ.އޭ އަށް ލިބެއެވެ.
މިއަހަރުގެ ޑިނަ ނައިޓް އަންނަ މަހުގެ 4 ވާ ހުކުރު ދުވަހުގެ ބޭއްވުމަށް ހަމަޖެހިފައިވާއިރު، މި ޑިނަރ ނައިޓުގެ ޓިކެޓެއްގެ އަގަކީ އެންމެ -/100 ރުފިޔާއެވެ.
