ބ. އަތޮޅުގައި ކޮންމެ އާއިލާއަކަށް ޑޮކްޓަރެއް ފޯރުކޮށްދިނުމުގެ ޕްރޮގްރާމްގައި ރަޖިސްޓްރީވުމަށް ލިބޭ ތަރުހީބު ވަރަށް ކުޑަ ކަމަށް، ބ. އަތޮޅުހޮސްޕިޓަލުން ބުނެފި އެވެ.
އަތޮޅުހޮސްޕިޓަލުން ބުނިގޮތުގައި ބ. އަތޮޅުގައި ދިރިއުޅޭ މީހުންގެ ތެރެއިން އެ ޕްރޮގްރާމުގައި މިހާތަނަށް ރަޖިސްޓްރީވީ 345 މީހުންނެވެ. ބ. އަތޮޅުގައި 13000 އަށް ވުރެ ގިނަ މީހުން ދިރިއުޅެ އެވެ.
“މި ޕްރޮގްރާމްގެ މައުލޫމާތު އިތުރަށް ފޯރުކޮށްދެވުމުގެ މަސައްކަތް މި އަންނަނީ ކުރަމުން. ރަޖިސްޓްރީ ކުރުމުގެ ފުރުސަތު މިހާރުވެސް ކުރިއަށްދާނެ،” ސީނިއާ ކޮމިއުނިޓީ ހެލްތް އޮފިސަރު ސިދްގީ އަބްދުﷲ އެވެ.
“ކޮންމެ އާއިލާއަކަށް ޑޮކްޓަރެއް” ހަމަޖެއްސުމަކީ ރިޔާސީ އިންތިހާބުގެ ކެމްޕޭން ތެރޭގައި ރައީސް އަބްދުﷲ ޔާމީން ވެވަޑައިގެންނެވި ވައުދެކެވެ.
މި ޕްރޮގްރާމުގެ ދަށުން މި ޚިދުމަތް ފޯރުކޮށްދެނީ އާއިލީ ޑޮކްޓަރެއްގެ ގޮތުގައި ކަނޑައަޅާ މެޑިކަލް އޮފިސަރެއްގެ އިތުރުން ނަރުހުންނާއި އިތުރު ސިއްހީ ޚިދުމަތްތެރިއެއް އެކުލެވޭ ޓީމަކުންކަމަށް ބ. އަތޮޅުހޮސްޕިޓަލުން ބުންޏެވެ.
