މިއަދަކީ އޭދަފުށި ޓައިމްސް ނުވަތަ “އީޓީ” އަށް 6 އަހަރު ފުރޭ ދުވަހެވެ. 3 މޭ 2008 ގައި އެއިރުގެ ޑިޕާޓްމަންޓް އޮފް އިންފޮމޭޝަންގައި ބ. އަތޮޅަށް ނިސްބަތްވާ ‘ކޮމިއުނިޓީ ނޫހެއް’ ނުވަތަ ‘އިޖުތިމާއީ ނޫހެއް’ ރެޖިސްޓްރީ ކުރީ ނުހަނު މާތް މަގުސަދެއްގައެވެ. އަދި ކޮމިއުނިޓީ ނޫސްވެރިކަމަކީ ކޮބައިކަމާއި ރާއްޖޭގައި ރަށު ފެންވަރާއި އަތޮޅު ފެންވަރުގައި އެކަމުގެ ހުރި މުހިންމު ކަމަށް ދިވެހިން އަލަށް ހޭލުންތެރިވަމުން އައި ދަނޑިވަޅެއްގައެވެ.
ރާއްޖޭގައި ވެބްސައިޓެއްގެ ގޮތުގައި ނަމަވެސް ދުވަހު ނޫހެއް ހިންގުމަކީ ފަސޭހަ ކަމަކަށް ނުވާއިރު، އަދި އީޓީ އަކީ ގައުމީ ނޫހަކަށް ނުވާއިރު، ބ. އަތޮޅުގައި އޮތް ކުޑަ މާކެޓުން އިޝްތިހާރު ލިބުނަސް ނުވަތަ ނުލިބުނަސް އީޓީ ކުރިއަށް ގެންދަން އީޓީގެ އެއިރުގެ ޓީމާއި މިހާރުގެ ޓީމުން ނިންމީ، ބ. އަތޮޅާއި އަދި މި އަތޮޅުގެ ވެރިރަށް ކަމަށްވާ އޭދަފުށީގައި، ގައުމީ ފެންވަރުގައި ނޫން ގޮތްގޮތަށް ނަމަވެސް، ބ. އަތޮޅުގެ މުޖުތަމައަށް މުހިންމު ވާނޭ ހަބަރާއި މައުލޫމާތު ގެނެސްދިނުމަށެވެ. އަދި އީޓީގައި ހިމަނާ މައުލޫމާމެދު ބ. އަތޮޅުގެ ރައްޔިތުންގެ އިތުބާރު ބޮޑު ވަމުން އަންނަ ވަރަކަށް އިޝްތިހާރު ލިބުނު ނަމަވެސް، އަޅުގަނޑުމެން މިއަދު ވެސް ފާހަގަ ކޮށްލަން ބޭނުން ވަނީ އީޓީ ހިންގަމުން އަންނަނީ ފައިދާއެއް ނެތި ކަމަށާއި މުޅިން ވެސް އީޓީ ޓީމުގެ މެންބަރުންގެ އަމިއްލަ ހަރަދުން ކަމެވެ.
ކޮމިއުނިޓީ ނޫސްވެރިކަން ނުވަތަ އިޖުތިމާއީ ނޫސްވެރިކަން ރާއްޖެއަށް މުހިންމުވާން ފެށީ 2008 ގައި ޑިމޮކްރެސީއާއެކު ލޯކަލް ގަވަނަންސް އައިސް، އަތޮޅުތައް ޕްރޮވިންސްތަކަކަށް ބެހިގެން ދިޔައީމެވެ. އެމެރިކާގައި ފަދައިން ޕްރޮވިންސްތަކާއި ސިޓީތަކާއި ޓައުންތަކަކީ ވެސް ވަކިވަކި ކޮމިއުނިޓީތަކެއް ނުވަތަ މުޖުތަމަތަކެއް ކަމަށްވާތީ، މި ފަދަ ތަންތަނުގައި އިޖުތިމާއީ ނޫސްވެރިކަން އަބަދުވެސް އުޅެނީ ވަރަށް ކުރީގަ އެވެ.
އީޓީ ރަޖިސްޓްރީ ކުރިއިރު ވެސް އީޓީގެ ޓީމުގައި އޮތީ މި މަގުސަދެވެ؛ މިސާލަކަށް، ބ. އަތޮޅުގެ ކޮންމެ ރަށެއްގެ ކޮންމެ ސްކޫލަކުން އެއް ވަނަ އަށް އަންނަ ކުއްޖާގެ ޕްރޮފައިލެއް ގައުމީ ނޫސްތަކަކުން ނުހަދާނެއެވެ. ނަމަވެސް މި ފަދަ ދަރިވަރުންނަކީ އެ ރަށެއް ނުވަތަ މި އަތޮޅު ހިމެނޭ ސަރަހައްދުގައި ދިރިއުޅޭ މުޖުތަމައުތަކަށް މުހިންމު ވާނެ މައުލޫމާތެކެވެ. އަދި މި އަތޮޅުގެ ރަށްރަށުގައި ތިބި އިލްމްވެރި އަދި ކުޅަދާނަ ކުދިންނާއި މީހުން، ބ. އަތޮޅުގެ ‘ބޮޑު މުޖުތަމަ’އުގައި ބަލައިގަނެ، މި އަތޮޅުގެ ލީޑަރުންނަށް ވުމަށް މަގުފަނިވަނީ ވެސް މިފަދަ ކޮމިއުނިޓީ ނޫސްވެރިކަމަކުންނެވެ.
އެހެންކަމުން އީޓީގެ 6 ވަނަ އުފަން ދުވަސް މިއަދު ފާހަގަ ކުރާއިރު، އަޅުގަނޑުމެން އީޓީ ޓީމުން އަބަދުވެސް މަސައްކަތް ކުރަމުން އަންނާނީ މި އަތޮޅަށް މުހިންމު އަދި އިލްމްވެރި ހަބަރާއި މައުލޫމާތު ފޯރުކޮށްދީ، ބ. އަތޮޅުގެ ހުރިހާ ރަށެއްގެ ރައްޔިތުންނަކީ ވެސް މައުލޫމާތުގެ މުއްސަނދިކަން ލިބެމުން އަންނަ، ހަޔާތުގެ މުހިންމު ނިންމުންތައް ނިންމާ ރައްޔިތަކަށް ހެދުމަށްޓަކައި ދެމިހުރުމުގައެވެ.
ޝުކްރިއްޔާ!!
އޭދަފުށި ޓައިމްސް ގެ 6 ވަނަ އަހަރީ ދުވަހުގެ މުނާސަބަތިގައި އީޓީ އަށް ލިޔުއްވާ އެންމެހާ ބޭފުޅުންނަށް ނުހަނު އިހްލާސް ތެރިކަމާއެކު މަރުހަބާ ދަންނަވަމެވެ. 24ގަޑި އިރު ތިޔަބޭފުޅުން ތިކުރައްވާ މަސައްކަތަކީ ބުރަ އަދި ހަމަ އެހާމެ އުދަގޫ މަސައްކަތެއް ކަން އަޅުގަޑު ޤަބޫލްކުރަމެވެ. އަޅުގަނޑުގެ ދުޢާ އަކީ ތިޔަކުދިން ތކުރާ މަސައްކަތައިގެން ކުރިއަށް ދިއުމުގެ ތައުފީޤްﷲ މިންވަރުކުރެއްވުމެވެ. އީޓީ އަށް އަދަށް ވުރެ ފެހި މާދަމާއެއް ދެއްކެވުމެވެ.
އަޅުގަނޑޭ ލިޔެފަ އިން އިރު ނޭނގެ އަޅުގަނޑު މީ ކާކު ކަމެއް! ލިޔުނު މީހާގެ ނަން ޖަހާފައި އިންނަނީ ވަރަށް މަދުން އީޓީގެ ލިޔުންތަކުގައ. ނަން ޖަހަން ބޭނުން ނުވާކަމުގައި ވަނީނަމަ ރަނގަޅުގޮތަކީ އަޅުގަނޑޭ އަހަންނޭ ކިޔައިގެން ނުލިޔުން ކަންނޭނގެ!