ޔުނެސްކޯ ބައޮސްފިއާ ރިޒާވްގެ ދަށުން ހިމާޔަތްކޮށްފައިވާ މިއަތޮޅު ހަނިފަރާއި ހަނިފަރު ސަރަހައްދު ސާފުކުރުމުގެ ޕްރޮގްރާމެއް ހިންގައިފި އެވެ.
ބައޮސްފިއާ ރިޒާވް އޮފީސް ހިންގެވުމާ ހަވާޅުވެހުންނެވި އައުޓްރިޗް އޮފިސަރު ޝާފީ އަލީ އީޓީ އަށް ވިދާޅުވީ އިއްޔެ ހެނދުނު 9:00 އިން ފެށިގެން މެންދުރު 3:00 އާ ހަމައަށް އޭދަފުށީގައި ހުރި ސަރުކާރު އޮފީސްތަކުގެ މުއައްޒަފުންނާއި ކައިރި ރިސޯޓްތަކުން ބައިވެރިވެ ކުރި މަސައްކަތުން އެ ރަށު ގޮނޑު ދޮށުންނާއި އެ ސަރަހައްދު ފަރު ތެރެއިން ގިނަ އަދަދެއްގެ ކުނި ނަގާފައިވާ ކަމަށެވެ. އަދި އެ ސަރަހައްދުންނެގި ކުނިތައް ކިހާދު މޯލްޑިވްސް ރިސޯޓް މެދުވެރިކޮށް ނައްތާލާފައިވާ ކަމަށްވެސް ޝަފީ ވިދާޅުވި އެވެ.
“މައިގަނޑު ގޮތެއްގައި ހުރީ ޕްލާސްްޓިކް ފުޅި އާއި ކަންވާރު ފަދަ ތަކެތި. ފަރުތެރެ ސާފުކުރީ ރިސޯޓްތަކުގެ ޑައިވަރުންގެ ޓީމަކުން، ރިސޯޓްތަކުން ވަރަށް ބޮޑު އެހީތެރިކަމެއް މިކަމަށް ލިބުނު. އެގޮތުން ބައިވެރިންގެ ދަތުރުފަތުރާއި، ކެއުމުގެ އިންތިޒާމުތައް އަދި ކުނި ނައްތާލުމުގެ މަސައްކަތްކުރީ ކައިރި ރިސޯޓްތަކުގެ އެހީތެރިކަމާއެކު،” ޝާފީ ވިދާޅުވި އެވެ.
ބަޔޮސްފިއާ ރިޒާވުގެ ދަށުން ބ. އަތޮޅުގައި ކަނޑައަޅާފައިވާ ކޯ އޭރިޔާތަކުގެ ތެރެއިން އެންމެ ހާއްސަ ތަނަކީ ހަނިފަރެވެ. އެއީ އެ ސަރަހައްދުން އެންމަޑި އާއި ފެހުރިހި ފެންނާތީ އެވެ. އެ ސަރަހައްދަކީ ފީނުމަށް ރާއްޖެ އަންނަ ޓޫރިސްޓުންގެވެސް ވަރަށް މުހިންމު މަންޒިލެކެވެ. ތަފާސް ހިސާބުތަކުން ދައްކާ ގޮތުގައި ހަނިފަރަށް ފީނާ މީހުންގެ އަތުން ދެ ލައްކަ ފަންސާސް ހާހަށް ވުރެ ގިނަ ޑޮލަރު ރާއްޖޭގެ އިގްތިސާދަށް އަހަރަކު ލިބެ އެވެ.
މިއީ އެ ސަރަހައްދުން އެންމަޑި އާއި ފެހުރިހި ފެންނަން ފަށާ ދުވަސްވަރެވެ. ކޮންމެ އަހަރެއްގެ ޖޫން މަހުން ފެށިގެން ޑިސެމްބަރު މަހާ ހަމައަށް ހަނިފަރު ކައިރިން އެންމަޑި އާއި ފެހުރިހި ފެނެ އެވެ.
