
ބ. އަތޮޅު ތައުލީމީ މަރުކަޒުގެ މިއަހަރުގެ ގުރުއާން ކިޔެވުމުގެ މުބާރާތުގެ ނުބަލަ ކިޔެވުމުގެ ބައިން އެއްވަނަ ހައިޝަމް ޚާލިދު އަދި ބަލައިގެން ކިޔެވުމުން އެއްވަނަ އިޔާން އަލީ ވަހީދު ރޭ ހޯދައިފިއެވެ.
އިއްޔެ އާއި އޭގެ ކުރީ ދުވަހު ކުރިއަށް ގެންދިޔަ މި މުބާރާތުގައި 113 ދަރިވަރުން ބައިވެރިވި އެވެ.

އުމުރު ފުރާ ތަކަށް ބަހާލައިގެން ކުރިއަށް ގެންދިޔަ މި މުބާރާތުގެ ނުބަލާ ކިޔެވުމުގެ ބައިން ދެވަނަ ހުސައިން ފަޒާލު މުހައްމަދު ހޯދިއިރު، އެ ބައިން ތިންވަނަ ހޯދީ މަރިޔަމް ނައުޝީން ޝަމީމު އެވެ.
މުބާރާތުގެ ބަލައިގެން ކިޔެވުމުގެ ބައިން ދެވަނަ ހޯދީ އަޝްހާ އަލީ ވަހީދު އެވެ. ތިންވަނަ ދެ ދަރިވަރުން ހޯދި އެވެ. އެއީ އައިޝަތު އުނޫޝާ އަންވަރު އާއި ޝަމާއިލް މުހައްމަދު ނަސީރެވެ.
މީގެ އިތުރުން އުމުރު ފުރާތަކުންވެސް އެއްވަނަ، ދެވަނަ އަދި ތިންވަނަ ހޮވާ ޓްރޮފީއާއި ސެޓްފިކެޓް ދިނެވެ.

އެ ސްކޫލުން ބުނި ގޮތުގައި މި މުބާރާތަކީ އަންނަ އަހަރު ބާއްވާ އަތޮޅު މުބާރާތަށާއި ގައުމީ މުބާރާތަށް އަމާޒުކޮށް ބޭއްވި މުބާރާތަކަށްވާތީ، މި މުބާރާތުގެ އެންމެ މޮޅު 15 ދަރިވަރުންނަށް އެ މުބާރާތްތަކުގައި ވާދަކުރުމުގެ ފުރުސަތު ލިބޭނެ އެވެ.