ގައުމީ އާ މަންހަޖަށް އަހުލުވެރިކުރުމުގެ ގޮތުން ބ. އަތޮޅުގެ ރަށްރަށުގެ ސްކޫލުތަކުގެ މުދައްރިސުން ތަމްރީން ކުރުމުގެ ވޯކްޝޮޕެއް ފަށައިފި އެވެ.
ކީ ސްޓޭޖް 2 މަރުހަލާގެ ޓީޗަރުންނަށް އަމާޒުކޮށްގެން ބާއްވާ މި ވޯކްޝޮޕްގައި ބ. އަތޮޅުގެ ރަށްރަށުން ޖުމްލަ 150 ޓީޗަރުން ބައިވެރިވެ އެވެ.
ޓީޗަރުން ތިން ބަޔަކަށް ބަހާލައިގެން މި ވޯކްޝޮޕް ކުރިއަށް ގެންދަނީ ބ. އަތޮޅު ތައުލީމީ މަރުކަޒުގަ އާއި އަތޮޅު މަދަރުސާގަ އެވެ.
ވޯކްޝޮޕްގައި ބައިވެރިންނަށް މައުލޫމާތު ފޯރުކޮށްދޭ ބައިތަކުގެ ތެރޭގައި އާ ގައުމީ މަންހަޖުގެ ދާއިރާތަކާއި، ދަރިވަރުންގެ ކިބާގައި އަށަގަންނަވަންޖެހޭ ގާބިލިޔަތާއި އަދި އެ ގާބިލްކަން އިތުރުކުރަނިވި ގޮތަކަށް ފެންވަރު ވަޒަންކުރުން ހިމެނެ އެވެ.
މި ވޯކްޝޮޕްގައި މައުލޫމާތުދެއްވަނީ ބ. އަތޮޅުގެ ސްކޫލުތަކުގައި މަސައްކަތްކުރައްވާ ޓީޗަރ ކަރިކިޔުލަމް އެމްބެސަޑަރުންނެވެ.
ރާއްޖޭގެ ތައުލީމީ އާ މަންހަޖަށް ކީ ސްޓޭޖް ދަރިވަރުންނަށް މިއަހަރުވަނީ އަމަލުކުރަން ފަށައިފަ އެވެ. ކީ ސްޓޭޖް 1 ގައި ހިމެނެނީ ގްރޭޑް 1، 2 އަދި 3 އެވެ. ކީ ސްޓޭޖް ދޭއް ގައި ހިމެނެނީ ގްރޭޑް 4،5 އަދި 6 އެވެ.
