ކޮންމެ އަހަރެއްގެ ބޮޑު ޗުއްޓީއާ ދިމާކޮށް ގިނަ ބަޔަކު ދަތުރުކުރެ އެވެ. މިއަހަރު ވެސް އެކަން އޮތީ ހަމަ މިގޮތަށެވެ. ޗުއްޓީއާ ދިމާކޮށް ގިނަ ބަޔަކު ދަތުރުކުރަން ފެށުމާ އެކު ސްޕީޑް ލޯންޗްތަކަށް ބާރު ބޮޑުވެ މިހާރުވަނީ ޖާގަ ލިބުން ދަތިވެފަ އެވެ.
”ވަރަށް ބާރުބޮޑުކޮށް މިއުޅެނީ، މިހަފްތާ އެއްކޮށް މިއޮތީ ފުލްކޮށް، ދެން އެންމެ އަވަހަށްވެސް ޖާގަލިބޭނީ އަންނަ ބުރާސްފަތި ދުވަހަށް،” މާލެއާއި އޭދަފުއްޓާ ދެމެދު ކޮންމެ ހަފްތާއެއްގެ ހޮނިހިރު، ހޯމަ އަދި ބުރާސްފަތި ފެރީގެ ހިދުމަތްދޭ އެއް ކުންފުނި ކަމަށްވާ ސޭލަމު ފެރީން ބުންޏެވެ.
މާލެއާ އޭދަފުއްޓާ ދެމެދު ދަތުރުކުރާ އެޓޯލް ކިއުޓް ފެރީގެ 50 މީހުންގެ ޖާގައި “އެޓޯލް ކިއުޓް ކްރޫޒާ” ގެ ދަތުރުތައް ވެސް ވަނީ ފުލްވެފަ އެވެ.
”ސްކޫލް ބޮޑު ޗުއްޓީ ވީމަ ބޮޑަށް ބާރުބޮޑުވެގެން މިއުޅެނީ. ދެކޮޅަށްވެސް ހަމަ ފުލްކޮށް އުޅެނީ، ކޮންމެ އަހަރަކުވެސް މިދުވަސްކޮޅު ބޭސްފަރުވާ އަށް ރަށުން ބޭރަށްދާ މީހުނާއި ޗުއްޓިއާ ދިމާކޮށް ހިތާނީ މޫސުމަށް ރަށަން އަންނަ މީހުން ގިނަ. ހަފްތާއެއްވަރު ނަގާމެ ހަމައަކަށް އެޅެން،” އެޓޯލް ކިއުޓް ފެރީން ވާހަކަ ދެއްކި ބޭފުޅަކު ވިދާޅުވި އެވެ.
ލޯންޗު ދަތުރުކުރާ ފަރާތްތަކުން ބުނީ ބޮޑު ޗުއްޓީއާ ދިމާކޮށް ލޯންޗު ދަތުރުތަކަށް ބާރު ބޮޑުވެގެން ދިޔަ ނަމަވެސް ހަފްތާއެއްހާ ދުވަސް ފަހުން ލޯންޗު ދަތުރުތައް ކުރިއެކޭ އެއްގޮތަށް ހަމައަކަށް އެޅޭނެ ކަމަށެވެ. ނަމަވެސް ޗުއްޓީ ނިމެން ކައިރިވުމާއެކު އަނެއްކާވެސް ދަތުރުތަކަށް ބާރު ބޮޑުވާނެކަމަށް އެ ފަރާތްތަކުން ބުންޏެވެ.
